Andy Murray me lot në sy ka bërë të ditur se do t’i jap fund karrierës në tenis pas Wimbledonit që mbahet gjatë verës.
Në një konferencë për media, dy-herë fituesi i Wimbledonit, ka thënë se lëndimi në ije i ka shkaktuar dhembje të mëdha të cilat do ta ndjekin në Australian Open, që ka thënë se do të jetë gara e tij e fundit.
Ai ka thënë se shpreson që të qëndrojë deri në muajin e Wimbledonit, por e ndjen se është hap i madh pjesëmarrja në të, pasi dhembja është aq e madhe sa shpesh nuk ka mundur t’i mbath çorapet apo këpucët.
“Është e qartë se kam pasur vështirësi për një kohë të gjatë dhe kam dhembje tash e dy muaj”, ka thënë Murray.
“Kam bërë gjithçka që të tentoj dhe të rikuperoj ijët, por nuk ka ndihmuar. Jam më mirë sesa para gjashtë muajsh, por kam dhimbje të mëdha. Ka qenë e vështirë”, ka shtuar ai.
“Do të luaj atje [Australian Open]. Mund të luaj edhe pak, por jo në nivelin që duhet. Dhembja është shumë e madhe dhe nuk dua që të vazhdoj të luaj kështu. Kam provuar çdo gjë dhe nuk ka funksionuar. Në dhjetor kam folur me ekipin dhe u kam thënë se nuk mund të vazhdoj kështu”, ka thënë Murray.
