Që prej datës 1 janar të vitit 2019, shërbimi urban publik në qytetin e Vlorës nuk do të jetë më funksional.
Kjo për shkak se bashkia e Vlorës prej vitesh ka pësuar humbje të thella nga shërbimi urban publik, duke kapur shifrën 440 milion lekë.
Duke qenë kështu, Këshilli bashkiak ka votuar unanimisht mbylljen e këtij institucioni që deri më tani është subvencionuar nga buxheti i bashkisë Vlorë.
Shërbimi urban publik ka regjistruar humbje të konsiderueshme, pasi paralelisht në Vlorë funksionon edhe shërbimi urban privat.
Shërbimi urban publik i bashkisë Vlorë ka në inventar 11 autobusë, nga të cilët vetëm pesë prej tyre janë ende në funksion, ndërsa 6 të tjerë janë jashtë shërbimit, pasi janë autobusë mjaft të vjetër.
