Pas ardhjes së një lojtari bjellorus që firmosi ditët e fundit për Vllazninë, sot konfirmohet edhe transferimi i një volejbolliste kubaneze, e cila ka nënshkruar për ekipin e Partizanit. Bëhet fjalë për 29-vjeçaren Dayesi Masso Casalis Casales, e cila luan si diagonaliste ose shutere kryesore.
Volejbollistja 1.84 metra e gjatë, ka disa ditë që ndodhet në Tiranë, ku ka qenë në provë dhe më pas ka firmosur për të kuqtë e trajnerit Roland Tarja. Ajo është volejbollistja e dytë e huaj në radhët e Partizanit këtë sezon, ku aktivizohet edhe një lojtare turke. Partizani është kampion në fuqi dhe synon që të ruajë këtë pozicion edhe këtë sezon.
Ardhja e Casales konsiderohet si një përforcim i rëndësishëm për Partizanin, që tashmë ka dy shutere të huaja shtatlarta dhe të forta. Skuadra kryeqytetase përforcohet ndjeshëm për fazën e dytë të kampionatit dhe për finalet e Kupës së Shqipërisë. Gjithsesi, merkatoja e janarit është ende e hapur dhe mund të rezervojë të tjera surpriza në të ardhmen.
