Leonita Hoxha: Synimet e mia janë të mëdha - Bota Sot
Leonita Hoxha: Synimet e mia janë të mëdha

Volejboll

Leonita Hoxha: Synimet e mia janë të mëdha

Nga: Kemajl Goca Më: 29 gusht 2019 Në ora: 13:13
Leonita Hoxha

Nuk e kishte të lehtë Leonita Hoxha që ta përcillte kampionatin nga tribuna, jo me fajin e saj por që klubi Ulpiana nuk ia kishte lëshuar fletlëshimin që të kalojë në KV Prishtina F.  

Volejbollistja e talentuar, që nuk ka më shumë se 20 vjet, e gjatë 183 centimetra, luan në pozitën e qendrës, po kthehet fuqishëm, të cilës ia mohuan të drejtën e lojës për një kohë! Ajo premton maksimumin në fanellën e Prishtina F, ekip që pretendon të luftojë për katër vendet e para.  

Image

KV Prishtina F

Leonita flet për ambiciet, si ndihet në klubin Prishtina F dhe si e përjetoi në lëkurën e saj që për një kohë mbetet jashtë fushës së lojës!

“Bota sot”: Që sa kohë merreni me volejboll dhe si iu lindi dashuria?
Leonita Hoxha: 
Me volejboll merrem që nga viti 2014. Dashuria për volejboll ka qenë qysh herët, duke filluar me garat komunale dhe ato regjionale në shkollën fillore në komunën e Lipjanit, ku për shumë vite radhazi kemi qenë kampion. Aty patën rastin që të me shohin edhe trajnerët e klubit të volejbollit Ulpiana nga Lipjani. Aty fillova hapat e parë si një sportiste e re por me ambicie të mëdha në këtë fushë.

“Bota sot”: Tash e një kohë në Prishtina F. si po ndjeheni, sa jeni e kënaqur dhe çka iu motivon më shumë? 
Leonita Hoxha:
Këtë vit, që nga janari jam pjesë e klubit Prishtina F, por për shkak të pengesës së transferit që bënë trajnerët e ekipit që lash pas, nuk mu mundësua që të jem pjesë e kampionatit. Ekipi me ka pritur shumë mirë, si trajnerët ashtu edhe vajzat. Të gjitha janë të mrekullueshme dhe kanë qenë ato që më kanë motivuar që mos ta ndjej mungesën e lojës edhe pse isha jashtë saj.  Besoj që gjatë kësaj sezone do të jap maksimumin nga vetja që të shkëlqejmë si ekip.

“Bota sot”: A jeni të demotivuar nga kjo pengesë që iu bë nga ana e klubit, që iu la jashtë fushës për 6 muaj?
Leonita Hoxha:
Në fillim ka qenë diçka shumë e rëndë me qenë një lojtare si unë jashtë kampionatit, por trajneret e Prishtina F kanë qenë ata që me kanë dhënë motiv dhe kanë punuar me mua në atë mënyrë që unë të mos humbi gjatë kësaj periudhe por të kthehem më e fuqishme se kurrë. Si këshillë për të gjithë trajnerët e të gjitha klubeve për situata të tilla, që të mos i pengojnë sportistet që të depërtojnë më shumë dhe të shprehin talentin e tyre që nesër këta mund të jenë e ardhmja e vendit dhe pa dyshim këta trajner do të mburreshin me ta.
 
“Bota sot”: Cilat janë synimet e Leonitës?
Leonita Hoxha:
Synimet e mia janë të mëdha në përgjithësi si sportiste, pasi që edhe jam studente e edukimit fizik dhe sportit, veçanërisht në volejboll. Sa i përket këtij viti shpresoj t’i përfundoj me sukses studimet duke qenë njëherazi edhe bursiste sikur vitin e kaluar. Synimi tjetër është të paraqitem sa më mirë me klubin e volejbollit Prishtina F dhe të korri një rezultat të mirë në fund, po ashtu shpresoje që edhe me punën e palodhshme që bëjë të jem edhe pjesë e kombëtares.

“Bota sot”: A synoni që në një të ardhme te luani edhe jashtë Kosovës?
Leonita Hoxha
: Pa dyshim që po. Kosova ka shumë sportiste të mirë në të gjitha fushat por kushtet dhe mundësitë për këta sportist janë të kufizuara. Është mundësi e mirë me shpreh talentin dhe me fitu përvojë të re në ndonjë shtet tjetër.

“Bota sot”: Pas një kohe pushimi të padrejtë, mezi prisni që të paraqiteni për Prishtinën F në ndeshjet zyrtare dhe a e sheh kandidate për kreun e tabelës?
Leonita Hoxha:
Puna që kemi bërë dhe vazhdojmë të bëjmë, besoj që kemi me arrit sukses pse jo edhe kreun e tabelës. Bashkëpunimi dhe ambiciet e klubit do të na bëjnë që të triumfojmë besojë në këtë sezon.

Shfaq komentet
comments powered by Disqus
Sot mund të lexoni Shfletoni kopertinat
Sondazh Pas votimit të projektligjeve për shndërrimin e FSK-së në ushtri, a mund të ketë inskenime nga Serbia për një luftë të re në Ballkan?
Loading...