Kastrioti i Ferizajt, lidere në renditjen, me optimizëm e pret sfidën e nesërme (18.30) me Skenderajn, ku edhe do të vendoset kampioni vjeshtor. Është kryendeshje e stinorit vjeshtor përkatësisht e javës së 9-të të elitës së volejbollit të Kosovës (femrat). Edon Ibrahimi, kryetrajner i Kastriotit, tha se është ndeshje e vështirë.
“Unë besoj se përparësi nuk ka përveç se luajmë para tifozëve tanë, jemi të përgatitur dhe të kompletuar.
Rrezikun? Nuk kanë vetëm një lojtare por kanë gjithë skuadrën pasi komplet 6-shi i parë janë edhe pjesë e Kombëtares A të Kosovës, gjithashtu edhe banka e tyre është shumë më e pasur se e jona, por nuk ka problem, ne jemi të përgatitur”, tha Ibrahimi për gazetën kombëtare “Bota sot”.
A jeni edhe në presion të Kupës së Federatës? “Sipas zërave që po qarkullojnë ekipet e tjera vetëm se janë përforcuar me lojtare nga jashtë ashtu edhe vendore për Kupën e Federatës, kurse ne mbetemi 100% Ferizaj, andaj presioni duhet të jetë mbi ato ekipe që shpenzojnë ndërsa për ne nuk ka presion, qëllimi jonë dihet dhe nuk ndryshon, të fitojmë gjithçka”, tha Ibrahimi.
