Është shumë energjik, i vlon zemra për suksese, por më shumë për të krijuar një brez të fuqishëm për të ardhmen, sidomos për kryeqytetin përkatësisht Prishtinën. Është drejtori sportiv i Prishtina F Mehdi Mehmeti që sot me Prishtinën F e përmbylli edicionin vjeshtor dhe me një humbje të thellë 3:0 në Gjilan nga kampionia në fuqi, Drita, lëshoi shansin për të shkuar në Kupën e Federatës.
Nëse të gjithë mund të thonë se Mehdiu nuk e përjetoi rëndë këtë humbje, padyshim se gënjejnë! Askush më shumë se Mehdiu nuk e ka dashur fitoren por Drita ishte e fortë dhe e disponuar, duke fituar me lehtë se sa pritej.
Çfarë i mbetet tani Mehdiut? I mbetet që të ndez një cigare, të merr frymë thellë, të mendoj seriozisht për një punë, për stinorin pranveror, nëse përnjëmend e dojnë play-off-in, duhet të gjejnë sponsor të fortë, sponsor që e kanë xhepin plotë, të hapin kuletën dhe të sjellin përforcime të klasit të lartë ose siç thonë në popull: T’jua bëjnë 8 me 2 rivaleve.
Kështu nuk e do, kështu e ka të vështirë, sepse lojtaret janë të reja e papërvojë dhe me këtë potencial vështirë e ka për katër vendet e para, ndërsa pozitën e 5-të ose të 6-të e ka të garantuar si sytë e ballit, askush nuk ia merr.
Mehdiut i duhet t’i përvjelë mëngët, të merr një letër dhe ta bëjnë planin për pranverë, çka duhet për të treguar se janë ekip me traditë.