Klubi i volejbollit Ferizaj shënon edhe një fitore por kësaj radhe në tavolinë jo në fushën e lojës kundër kampionit në fuqi, Luboteni, në xhiron e dytë të Superligës A të Kosovës në volejboll (meshkujt).
“Një tjetër fitore, mirëpo me rezultat zyrtar!
Ferizaj e mbyll xhiron e dytë të Play Off-it me rezultat zyrtar 3:0 ndaj ekipit të Lubotenit, pasi që nuk u paraqitën fare në fushë ekipi kundërshtar.
Ndeshjen e radhës e zhvillojmë të dielën (21 qershor) ndaj ekipit të Prishtina Volley, në Pallatin e Rinisë në Prishtinë”, thuhet nga Ferizaj.
Siç merret vesh nga burimet e afërta me klubin Luboteni nga Ferizaj, disa nga lojtarët nuk kanë pranuar që të paraqiten në fushë pa u bërë edhe testi i lojtarëve për Covid 19. Më konkretisht disa nga prindërit e lojtarëve kanë kërkuar testin me arsyetim që mos të rrezikohet shëndeti i tyre. Kjo ka rezultuar që kampioni mos të paraqitet në fushë dhe mos ta rrezikon shëndetin e lojtarëve.