Volejbollistet e Prishtina F nuk njohin rivale në Superligën e Kosovës.
Vashat nga kryeqyteti pa mund të madh triumfojnë me rezultat 3:0 (25:12, 25:11, 25:16) ndaj Grykës, në takimin që u zhvillua në Drenas.
Skuadra më e vjetër në kryeqytet në konkurrencën e femrave, setin e parë e filloi furishëm, duke triumfuar me 25:12, të cilat me të njëjtin ritëm vazhdojnë edhe në setin e dytë, duke ngadhënjyer me 25:11.
Në setin e tretë Gryka u orvat me mish e më shpirt por të pafuqishme ndaj vashave të Prishtinës, që dallonin me cilësi.
Edhe setin e tretë kryeqytetaset e fitojnë me 25:16 dhe ndeshjen me rezultat të përgjithshëm 3:0.
Prishtina ka shënuar fitoren e gjashtë rresht nga gjashtë takimet e deritashme, duke u shndërruar në një ekip të frikshme për secilën kundërshtare!
Volejbollistet e Prishtinës, kush më shumë e kush më pak dhanë maksimumin për fitoren e gjashtë rresht, që nga Elda Muçolli, Jehona Berisha, Leonita Hoxha, Donika Xhemajli, Albesa Drushiti, Natalia Tahiri, Finesa Sylejmani, Mirjeta Bylykbashi, Nita Bekteshi, Rrahime Maliqaj etj.
Pas ndeshjes kryetrajneri i Prishtinës, Bahri Gjinovcit, i buzëqeshte fytyra për fitoren e gjashtë dhe ka fjalë miradije për angazhimin dhe lojën e mirë të volejbollisteve të tij.
Ai së bashku me Adriatik Kajtazin dhanë instruksione që i zbatuan me sukses volejbollistet.
Edhe drejtori sportiv, Mehdi Mehmeti, edhe presidentja Ganimete Gërbovci, edhe sekretari Fejzullah Ademi dhe gjithë udhëheqësia e klubit, janë sikur në qielli e shtatë jo vetëm për fitoret rresht, por që kanë ndërtuar një ekip model, me synime të qarta, për të luftuar edhe për titullin e kampionit.
