Drita nuk ka lejuar që titulli të shkojë në Skenderaj sonte, duke mposhtur ekipin e Ylli Kadriut në palestrën "Bashkim Selishta-Petriti", të mërkurën mbrëma.
Në praninë e shumë shikuesve e volejbolldashësve, "Intelektualet" triumfuan me rezultat 3-2 (25:21, 25:23, 27:29, 20:25, 15:10).
Ishte një ndeshje jashtëzakonisht interesante me plot kthesa në rezultat, ndërsa Skenderaj humbi mundësinë që të ngriste trofeun në Gjilan, me Dritën që tash ngushton disavantazhin në përballjet e këtyre finaleve në 2-1.
Ishin nikoqiret ato që e filluan më së miri takimin duke fituar dy setet e parë me rezultate të ngushta.
Mirëpo, skenderajaset u rikthyen në dy setet pasues, para se Drita të tregohej më efikase në setin e pestë për ta fituar dhe për ta çuar këtë finale në ndeshjen e katërt.
