Më qëllim të përkrahjes për shqiptarët që jetojnë në Kosovën Lindore, Lëvizja për Bashkim ka filluar aksionin “Presheva është Kosovë”, duke vendosur kështu pankarta në kryeqytet, që simbolizonin dëshirën e shqiptarëve që jetojnë atje për liri dhe pavarësi.
“Populli shqiptar i cili jeton në trojet e veta në Preshevë, Bujanoc e Medvegjë i ka të gjitha karakteristikat e kombit: ai është formuar historikisht në bazë të gjuhës së përbashkët, vazhdimësisë territoriale, formimit të njëjtë shpirtëror, si dhe kompaktësisë ekonomike me pjesët tjetra të kombit. Prandaj populli shqiptar në këto komuna e ka të drejtën e patjetërsueshme të vetëvendosjes së kombeve deri në shkëputje”, thanë drejtuesit e Lëvizjes për Bashkim.
Fitor Murati, anëtar i Lëvizjes për Bashkim, tha se ky aksion është marrë duke pasur parasysh se neglizhencën dhe politikën pasive që deri më sot po ndjekin Qeveria e Kosovës dhe ajo e Shqipërisë ndaj popullit shqiptarë në ato treva. “Presheva, Bujanoci e Medvegja aktualisht jetojnë në kushte pushtimi - nën dhunë, terror e militarizëm dhe nën tendencë të vazhdueshme për shpërngulje e asimilim. Është mjaftë brengosëse fakti se përderisa shqiptarët atje janë në rrezik të shpërnguljes, politika shqiptare ndjekë një politikë pasive ndaj atyre”, tha Murati.
