Qeveria e Kosovës përmes një deklarate për media ka dënuar ashpër sulmin e dhunshëm ndaj kryeministrit Hashim Thaçi dhe bashkëpunëtorëve të tij që ka ndodhur të mërkurën në Deçan, pas përfundimit të tubimit parazgjedhor të PDK-së ku ai mori pjesë në cilësinë e kryetarit të kësaj partie.
“Kosova është krenare me demokracinë e saj. Ata që veprojnë me dhunë kundër kësaj demokracie dhe institucioneve të saj përfaqësuese e dëmtojnë shtetin tonë. Ne duhet të sillemi si një demokraci e pjekur dhe përdorimi i dhunës është i papranueshëm”, thuhet në deklaratë.
Ekzekutivi vendor u bën thirrje të gjithë nxitësve të dhunës që të ndalojnë këto sjellje, që të kërkojnë falje dhe të sillen si duhet në frymën e demokracisë, për arritjen e së cilës kemi sakrifikuar të gjithë.
“Ndërhyrja në procesin zgjedhor është një shkelje e rëndë dhe aktet kriminale te nxitura politikisht do të ndiqen penalisht nga organet përgjegjëse”, përfundon deklarata e Qeverisë së Kosovës.
