Sonte në mesnatë fillon fushata për garën e balotazhit. Do të jenë vetëm shtatë ditë dhe do të ketë nga dy kandidatë në 21 komuna të Kosovës. Përderisa ligji e përcakton që balotazhi në Kosovë të zhvillohet katër javë pas raundit të parë, teknikisht punët duket të mos jenë ende gati.
Shtatë ankesa të kandidates së koalicionit AKR-LDD për kryetare të Gjakovës, Mimoza Kusari-Lila, të cilat i kishte refuzuar paraprakisht Komisioni Zgjedhor për Ankesa dhe Parashtresa, ende nuk janë shqyrtuar nga Gjykata Supreme e Kosovës, sado që ato janë deponuar që nga e hëna në këtë gjykatë.
Mosshqyrtimi i tyre është duke mbajtur peng certifikimin e rezultateve të raundit të parë dhe me këtë edhe shtypjen e fletëvotimeve për balotazh.
Komisioni Zgjedhor për Ankesa dhe Parashtresa bënë të ditur se ky komision ende nuk ka marrë ndonjë vendim nga Gjykata Supreme për shtatë ankesa të kandidates së koalicionit AKR-LDD për Kryetare të Gjakovës, Mimoza Kusari-Lila.
Për balotazh garojnë 17 kandidatë të Partisë Demokratike të Kosovës, 12 të Lidhjes Demokratike të Kosovës, 7 të Aleancës për Ardhmërinë e Kosovës, 2 të Lidhjes Demokratike të Dardanisë, 1 i Aleancës Kosova e Re, një kandidat i pavarur dhe dy kandidatë nga subjektet politike serbe kanë mbetur në garë pasi që në komunat përkatëse asnjë nga ta nuk mundi ta sigurojë 50 përqindëshin e nevojshëm që të zgjidhet Kryetar që në raundin e parë.
Gara e balotazhit sipas komunave:
Gjilan: Qemajl Mustafa PDK - Fatmir Rexhepi LDK
Dragash: Salim Jonuzi PDK - Halim Shemsedini LDK
Istog: Fadil Ferati LDK - Naim Imeraj AAK
Kaçanik: Xhabir Zharku PDK - Tahir Çaka AAK
Klinë: Sokol Bashota PDK - Enver Berisha AAK
Kamenicë: Begzad Sinani PDK - Shaip Surdulli LDK
Mitrovicë: Avni Kastrati PDK - Nexhmedin Spahiu AKR-LDD
Lipjan: Shukri Buja PDK - Imri Ahmeti LDK
Novobërdë: Bajrush Ymeri LDK - Radovan Deniq SNSD
Obiliq: Haki Mjeku PDK - Mehmet Krasniqi LDK
Rahovec: Qazim Qeska PDK - Ibrahim Kryeziu LDK
Pejë: Ali Berisha AAK - Elmi Berisha LDD-AKR
Podujevë: Agim Veliu LDK - Muhamet Latifi PDK
Prizren: Ramadan Muja PDK - Hanefi Muharremi LDK
Shtërpcë: Bratislav Nikoliq SLS - Beqir Fejzullahu PDK
Suharekë: Blerim Kuçi AAK - Ramë Vataj PDK
Viti: Sokol Haliti LDD - Nexhmedin Arifi PDK
Vushtrri: Bajram Mulaku PDK - Muharrem Shabani AAK
Malishevë: Isni Kilaj PDK - Januz Kastrati LDK
Junik: Agron Kuçi AAK - Tahir Isufaj LDK
Hani i Elezit: Rufki Suma (i pavarur) - Mehmet Ballazhi PDK
