Eksperti i mirënjohur amerikan për Balkanin, Daniel Server tha se opinioni i GJND së nuk do të ndryshojë faktet bazë për pavarësinë e Kosovës. Server theksoi se opinioni duhet studiuar me kujdes dhe nuk duhet ngutur me vlerësimet për të. "Kosova dhe Serbia mund të bisedojnë edhe për shkëmbimin e territoreve, por duhet të kenë parasysh pasojat", theksoi shefi i Institutit Amerikan për Paqe me seli në Uashington. Nga ana tjetër, Server vlerësoi se incidentet në veri duhen marrë si paralajmërime serioze. Sa i përket paralajmërimeve për njohje të reja të Kosovës, pas opinionit të GJND-së, Server thotë se ka disa vende të cilat kanë hezituar të veprojnë derisa Gjykata të bëjë publik opinionin e vet. Ai shpreson të "shohë Kosovën të ketë të siguruar dikund rreth 100 njohje në një të ardhme të afërt", duke shtuar se kjo ishte një "qëllim i rëndësishëm". Duke komentuar përpjekjet e Serbisë për të filluar negociata të reja për statusin e Kosovës, Server thotë se nuk sheh "rrethana në të cilat Prishtina do të pranonte të negocionte për çështjen e statusit". "Dua të jem i qartë: ka shumë çështje për të cilat Prishtina dhe Beogradi mund të flasin dhe të provojnë t'i zgjidhin. Unë vërtet nuk i kushtoj rëndësi faktit se si quhen bisedimet, por është e rëndësishme që palët të ulen dhe të fillojnë të zhvillojnë marrëdhënie të mira fqinjësore", theksoi Server në një intervistë për Radio Kosovën.