Deputetja e Parlamentit Evropian, Tanja Fajon nga Sllovenia, e cila ka përgatitur raportin për heqjen e vizave për Shqipërinë dhe Bosnjën e Hercegovinën, ka theksuar të mërkurën në Bruksel se këto dy shtete janë të gatshme për këtë hap dhe se pritjet e qytetarëve të këtyre dy vendeve që Parlamenti Evropian të enjten të ndezë dritën e gjelbër për heqjen e vizave është e arsyeshme.
Si raporton gazeta sllovene “Delo”, Fajon me këtë rast ka tërhequr vërejtjen se një problem serioz mbetet Kosova dhe se duhet gjetur sa më parë zgjidhje edhe për qytetarët e saj, sepse izolimi i tyre do të jetë edhe më i madh pas heqjes së vizave për banorët e pesë shteteve tjera të Ballkanit perëndimor.
