Refugjatët serbë nga Kosova, të strehuar në Mal të Zi, kanë shprehur dëshirën që të përfshihen në regjistrimin e popullsisë në Kosovë, që do të mbahet në muajin prill.
Kryetari i shoqatës së refugjatëve serbë, Milenko Jovanoviq, ka thënë se paraprakisht duhet krijuar parakushte për të marrë pjesë në procesin e regjistrimit.
Po ashtu, sipas tij, duhet siguruar mbikëqyrje serioze nga bashkësia ndërkombëtare që të mos abuzohen të dhënat e regjistrimit në dëm të serbëve, malazezëve, romëve, boshnjakëve e qytetarëve të tjerë joshqiptarë, thotë Jovanoviq.
Sipas mendimit të tij, bojkotimi eventual i regjistrimit mund të rrezikonte pronat dhe të drejtat e tjera të arritura të refugjatëve. Por Jovanoviq konsideron se përgjegjësinë më të madhe e kanë ndërkombëtarët, sepse sipas tij "institucionet e Kosovës nuk kanë kredibilitet as legjitimitet për të realizuar në mënyrë të pavarur procesin e regjistrimit".
