Shqipëria do të ndërtojë hidrocentrale në kufi me Kosovën, në komunat Zapod dhe Topojan të Kukësit. Këshilli kombëtar për rregullimin e territorit ka miratuar më 6 korrik një projekt që shtrihet në një zonë me sipërfaqe 580 km katrorë, nga e cila 50% gjëndet në territorin e Shqipërisë dhe 50% në Kosovë. Projekti me një vlerë prej 30 milion euro parashikon që secili Hidrocentral të ketë fuqi prej 25 megavat duke arritur prodhimin e 120 milionë kilovat/orë energji në vit. Nisur nga fakti se pala kosovare parashikon ndërtimin e Hidrocentralit të Zhurit, Kryeministri Berisha ka thënë se "do të krijohet një komision ndërkufitar me palën kosovare, i cili do të shqyrtojë çështjen e ujërave ndërkufitare dhe shfrytëzimin e tyre". Berisha ka nënvizuar se do të respektohen rregullat ndërkombëtare dhe se kjo çështje do të zgjidhet në bazë të interesit kombëtar. Megjithë vullnetin e fortë politik për bashkepunim të ngushtë ekonomik, Shqipëria dhe Kosova ende nuk kanë arritur të zbatojnë projekte të përbashkëta të rëndësishme. Ndërtimi i rrugës së re që lidh të dy vendet (aksi Durrës Morinë) besohet si një mundësi konkrete serioze për t'i hapur rrugën projekteve me interes reciprok.