Nëpërmjet një Deklarate për shtyp të Ministrisë së Punëve të Jashtme të Republikës së Shqipërisë, thuhet: "Ministria e Punëve të Jashtme të Republikës së Shqipërisë u njoh me vendimin e Dhomës së Apelit të Gjykatës Ndërkombëtare për Krimet e Luftës në Ish-Jugosllavi për rigjykim të pjesshëm të Ramush Haradinaj dhe dy bashkëluftëtarëve të tij.
Ministria e Punëve të Jashtme beson se Haradinaj, një nga ish-komandantët kryesorë të UÇK-së, dhe ish-Kryeministër i Kosovës, siç u ballafaqua me dinjitet më parë, do të dijë të argumentojë dhe mbrojë pafajësinë e tij edhe këtë radhë".
Më tej në deklaratë thuhet "Ministria e Punëve të Jashtme është gjithashtu e bindur se populli dhe institucionet e Republikës së Kosovës, ashtu si dhe më parë, do të tregojnë maturi dhe qetësi, duke i përballuar me dinjitet këto momente të rëndësishme që po kalon Kosova".
