Ish-pjesëtari i Ushtrisë Çlirimtare të Kosovës, Jon Harrison, që në luftën e Kosovës kishte ardhur nga Anglia ka thënë po i bëhet nder i madh që një rrugë në Prizren do të mbajë emrin e tij.
“Duhet të falënderoj zyrtarët e komunës që po emërojnë një rrugë me emrin tim. Është gjëja më e jashtëzakonshme që më ka ndodhur në jetë – që një rrugë të emërohet me emrin tim”, ka thënë Harrison në Info Magazine.
Madje Harrison tha se nuk do të mund të përmbahet ditën kur të ndodhë inaugurimi i rrugës.
“Nuk besoj që do të mund t’i mbaj lotët atë ditë”.
Ai edhe njëherë tjetër ka folur për krenarinë që ndjenë që ishte pjesë e UÇK-së.
“Jam shumë krenar me emblemën e UÇK-së, ndaj e mbaj gjithmonë me vete. Edhe unazën e mbaj gjithmonë, sepse paraqet brigadën time. Ndërsa familja ime është shumë krenare për punën që kam bërë në Kosovë”.
Gjithsesi, Harrison nuk e ka mohuar se Kosova ka shumë probleme, por ai thotë se ka besim në një veti të kosovarëve.
“Mendoj që e kemi një boshllëk të madh, flas këtu për nivelin e papunësisë dhe standardin e jetës. Por një gjë që kam mësuar nga kosovarët është se ata janë të pathyeshëm”.
