Presidenti i Kosovës Hashim Thaçi sot është takuar me zëvendëspresidentin e SHBA-ve Joe Biden.
Thaçi ka thënë se në jetën e tij në kohë dhe në rrethana të ndryshme, ka takuar shumë liderë botërorë, por sipas tij, Biden mbetet inspirim dhe modeli më i përkryer.
“Ajo çfarë e bën të veçantë zëvendëspresidentin Biden, ndër të tjera është urtësia, mençuria dhe sinqeriteti i tij. I tillë ishte dhe ka qenë në të gjitha takimet që kam pasur përgjatë gjithë këtyre viteve. I tillë ishte edhe në takimin e sotëm”, ka thënë Thaçi, përcjell Bota sot.
Sipas tij, përkushtimi i Amerikës dhe përkushtimi personal i zëvendëspresidentit Biden për paqen në Kosovë, në rajon dhe më gjerë mbetet i përhershëm, sepse është interes strategjik i SHBA-së.
“Prandaj, jam i sigurt se ky përkushtim do të vazhdojë edhe gjatë administratës së re. Ndërsa, zëvendëspresidenti Biden dhe gjithë familja e tij, tani dhe përgjithmonë, Kosovën duhet ta konsiderojnë si shtëpinë e tyre”, ka theksuar presidenti Thaçi.
“Ndjehem njeri me fat dhe krenar që vendi im mbështetet nga njerëz të tillë të jashtëzakonshëm si zëvendëspresidenti Biden. Le të mbetet e përjetshme dhe e bekuar kjo miqësi ndërmjet Kosovës dhe Amerikës”, ka shkruar Thaçi në Facebook./BS/
