Rachel Lindon, avokatja franceze që është caktuar për të mbrojtur ish-kryeministrin e Kosovës dhe liderin e Aleancës për Ardhmërinë e Kosovës, Ramush Haradinajn, ka thënë sot para gjykatësve franceze se akuza që qëndron në Interpol për klientin e saj është e kundërligjshme, sepse Haradinaj tashmë është liruar nga ato akuza.
Lindon është shprehur e bindur se rezultati final i këtij gjykimi do të jetë lirimi përfundimtar i Haradinajt, refuzimi i kërkesës së Serbisë për ekstradimin e tij dhe anulimi i akuzave në Interpol për ish-gjeneralin e Ushtrisë Çlirimtare të Kosovës.
“Rezultati padyshim do të jetë anulimi i akuzave në Interpol të cilat janë të pavend dhe kërkesa për ekstradim duhet të refuzohet”, ka thënë Lindon.
“Njoftimi në Interpol është i paligjshëm”, argumentoi ajo para gjykatësve.
Lindon vazhdoi duke theksuar se klienti i saj është liruar nga këto akuza në vitin 2012 nga Gjykata Ndërkombëtare në Hagë.
Madje ajo ka shkuar tutje, duke akuzuar Serbinë se po shkelë rezolutën e Organizatës së Kombeve të Bashkuara duke guxuar të bëjë kërkesë për ekstradim.
