Presidenti i Kosovës, Hashim Thaçi, ka thumbuar kryetarin e Komunës së Prishtinës, Shpend Ahmeti, për qeverisjen në kryeqytetin e vendit.
Thaçi ka thënë se “ka më shumë ndërtime pa leje në Prishtinë” se në veriun e vendit, duke iu përgjigjur një pyetjeje se pse shteti nuk e ka trajtuar murin e ndërtuar nga serbët në veri të Mitrovicës si çdo ndërtim tjetër pa leje, por ka miratuar një rezolutë enkas për të në Kuvend, në “Zona e Debatit”.
Thaçi po ashtu ka thënë se më shqetësuese është ndotja në Prishtinë se sa muri në veri. “Muri do të hiqet shumë shpejt. Por, për ne shqetësim është ajri i ndotur në Prishtinë”, ka thënë Thaçi.
E, kryeministri i Shqipërisë, Edi Rama, i pranishëm bashkë me Thaçin në debat, sikur i ka dalë në mbrojtje pak kreut të Prishtinës, që vjen nga radhët e Lëvizjes Vetëvendosje.
Rama ka sugjeruar se Thaçi po bën fushatë, duke thënë se “kjo tregon që keni edhe zgjedhje lokale në Kosovë”.
