Donika Gërvalla, vajza e heroit Jusuf Gërvalla, dhe anëtare e LDK-së, përmes një postimi në facebook, ka komentuar zhvillimet e fundit në skenën politike dhe kandidatin për kryeministër.
“Lidhja Demokratike e Kosovës duhet të ofrojë një kandidat serioz për kryeministër, i cili simbolizon mbi të gjitha kredibilitet dhe qëndrim dinjitoz. LDK duhet t'i ofrojë votuesit të saj një listë, e cila me përbërjen e saj garanton që janë kuptuar gabimet e së kaluarës dhe ato nuk mund të përsëriten më. Vetëm atëherë LDK-ja mund të ringjallë tek elektorati i saj besimin e humbur”, ka shkruar Gërvalla, përcjellë “Bota sot”.
Sipas Gërvallës, nëse LDK-ja e bën këtë, atëherë Kadri Veseli mund të organizojë shfaqje teatrale sa të dëshirojë, sepse nuk do të ketë shans të fitojë.
Ja postimi i saj i plotë:
Qindra mijëra votues janë duke pritur
Pas vendimit të drejtë dhe të domosdoshëm të Isa Mustafës për të mos qenë bartës i listës së LDK-së dhe për të mos kandiduar më për kryeministër, pra për të hapur rrugën për një ringjallje të LDK-së, Lidhja Demokratike e Kosovës mund të çlirohet nga kurthi i PDK-së, në të cilin e futën pa nevojë Isa Mustafa, Lutfi Haziri, Agim Veliu dhe të tjerë.
Ky hap i Isa Mustafës ka kuptim vetëm atëherë kur këto deklarata dokumentohen në ofertën që LDK do t'i bëjë votuesit në zgjedhjet e ardhshme dhe shpresa në LDK nuk varroset nga lojërat taktike të gardës së vjetër rreth Isa Mustafës.
Lidhja Demokratike e Kosovës duhet të ofrojë një kandidat serioz për kryeministër, i cili simbolizon mbi të gjitha kredibilitet dhe qëndrim dinjitoz. LDK duhet t'i ofrojë votuesit të saj një listë, e cila me përbërjen e saj garanton që janë kuptuar gabimet e së kaluarës dhe ato nuk mund të përsëriten më. Vetëm atëherë LDK-ja mund të ringjallë tek elektorati i saj besimin e humbur.
Vetëm nëse lista e LDK-së kryesohet nga një person kompetent dhe me kredibilitet dhe nëse votuesit në listën e LDK-së do të gjejnë personalitete të besueshme dhe të dashura për ta, atëherë LDK-ja do të mund jo vetëm të ndal rënien në humnerë, por edhe të ngrihet si forca politike e parë në Kosovë.
Qindra mijëra votues janë duke e pritur këtë. Qindra mijëra votues të cilët shumë qartë kanë treguar se LDK-në e votojnë përsëri vetëm pasi të jetë kthyer në parimet e saj dhe të ketë kthyer besimin e humbur. Qindra mijëra votues, të cilët kanë bërë të qartë se ky është minimumi i domosdoshëm për të nxjerrë në kuti të votimit votuesin tradicional dhe besnik të LDK-së.
Deri të premten ka kohë për të marrë vendimet e duhura. Nëse LDK-ja e bën këtë, atëherë Kadri Veseli mund të organizojë shfaqje teatrale sa të dëshirojë, sepse nuk do të ketë shans të fitojë. Ky do të ishte një shërbim i madh, të cilin LDK ia ka borxh Kosovës. LDK nuk mund t'i largohet përgjegjësisë që mban për Kosovën dhe të ardhmen e saj.
