Zyrtarë të koalicionit PDK-AAK-Nisma kanë shtuar zërat në deklaratat e tyre të fundit se për formimin e Qeverisë së re, ata kanë siguruar numrat përmes deputetëve të Lidhjes Demokratike të Kosovës.
Pal Lekaj nga Aleanca për Ardhmërinë e Kosovës, është shprehur i bindur se Ramush Haradinaj do të jetë kryeministër i ardhshëm i Kosovës dhe se ai do të marrë vota edhe nga deputetët e LDK-së.
“Ka deputetë të subjekteve politike, përfshirë edhe LDK-në, që do ta votojnë Haradinajn”, ka thënë mbrëmë Lekaj.
Por, deklaratën e Lekaj, e ka demantuar në një prononcim për gazetën “Bota sot” deputeti i LDK-së Anton Quni.
Ky i fundit ka mohuar kategorikisht se deputetë të partisë së tij, do të votojnë për kandidantin për kryeministër të PAN-it, Ramush Haradinaj.
“Asgjë të vërtetë nuk ka, absolutisht asgjë. Zero votë nga LDK-ja për koalicionin PAN. Se çka po dojnë ata duhet pyetur ata, por deri më tani asnjë votë nuk e kanë të garantuar prej deputetëve të LDK-së”, ka deklaruar Quni.
Ai ka theksuar se dëshmi për këtë i ka bisedat dhe informatat me kolegët e tij të partisë.
“Ato informata që bazohem unë, në bisedat me kolegët e mi deputetë, asnjë deputet nuk ka garantuar votë për kandidatin për kryeministër të PAN-it”, ka shtuar Anton Quni për “Bota sot”.
