Komisionari për zgjerim i Bashkimit Evropian, Johannes Hahn, shprehu besimin se liderët e vendeve të Ballkanit Perëndimor do të konfirmojnë formimin e një hapësire rajonale ekonomike.
“Kjo do të nënkuptonte krijimin e një zone prej rreth 20 milionë njerëzish, në të cilën do të kishte qarkullim të lirë të mallrave dhe shërbimeve”, tha Hahn në Samitin e BE-së dhe të Ballkanit që po mbahet në Trieste të Italisë.
Hahn tha se hapësira e përbashkët ekonomike do të rriste shkëmbimet tregtare në Ballkanin Perëndomor, të cilat, sipas tij, kanë ngecur.
“Ata që besojnë se tregu ekonomik rajonal mund të pengojë idenë e anëtarësimit të ardhshëm të Ballkanit Perëndimor në BE, gabojnë. Është e kundërta. Bëhet fjalë për përgatitjen e rajonit për treg të përbashkët të BE-së”, tha Hahn.
Samiti në Trieste ka mbledhur udhëheqësit e Ballkanit Perëndimor dhe të Bashkimit Evropian, për të diskutuar mënyrat e integrimit të rajonit në BE.
Ky është tubimi i katërt i tillë në kuadër të “Procesit të Berlinit”, të cilin e ka nisur kancelarja gjermane, Angela Merkel, në vitin 2014.
