Sulmin ndaj gruas së ministrit në detyrë Blerand Stavileci, Vitore Metaj Stavileci sot në Prishtinë e ka dënuar edhe kanddiati për kryeministër nga radhët e koalicionit PAN Ramush Haradinaj.
Haradinaj nëpërmjet rrjetit social Facebook ka thënë se kryerësit e këtij akti të shëmtuar duhet të kapen menjëherë dhe se nuk do të lejojnë që Kosova të shndërrohet në vend të pasigurt për qytetarët e saj.
Postimi i Haradinajt në Facebook:
Sulmi ndaj zonjës Stavileci, bashkështorte e Ministrit Stavileci, është një akt kriminal, dhe duhet të trajtohet i tillë. Kryesit e këtij sulmi të shëmtuar, duhet të zihen sa më parë dhe mbi ta të bjerë gjithë forca e ligjit. Nuk do të lejojmë që Kosova të shndërrohet në vend të pasigurt për qytetarët e saj. Organet e rendit dhe të ligjit ta bëjnë punën e tyre pa u vonuar për asnjë çast.
Shteti i Kosovës dhe shoqëria jonë nuk mund të qëndrojnë indiferent ndaj kësaj dukurie që nuk ka asgjë të përbashkët me ne si komb e si shoqëri.