Kryeministrit të Kosovës, Ramush Haradinaj i është organizuar pritje ceremoniale , gjatë vizitës që ai i bëri Forcës së Sigurisë së Kosovës (FSK).
Kryeministri Haradinaj i cili gjatë kësaj vizite u njoftua për të arriturat e Forcës së Sigurisë, tha se ky është një institucion, shembull i suksesit. Ndërsa tha se aleatët e Kosovës më shumë se kurrë janë me Kosovën dhe FSK-në, për t’i dhënë mandatin kushtetues ushtrisë së Kosovës.
Haradinaj: Këtu mund të flasim vetëm për sukses
“Ka dhe institucione që flasin për sukses. Pra këtu është një adresë, që mund të flasim vetëm për sukses. Është një adresë ku suksesi më i madh është besimi i qytetarëve të vendit me FSK-në, me Ministrinë. Ky besim duhet të lakmohet nga plot institucione tjera të vendit., kjo shkallë e lartë e besimit. Ka një sekret pse ekziston ky besim. Është një besnikëri në shërbim të gjithë pjesëtarëve të forcës. Është një besnikëri në misionin që kanë me i shërby atdheut, me i shërby qytetarëve. Po ashtu është besnikëri ndaj aleatëve të Kosovës, në temën e sigurisë. Aleatëve që mund t’iu them dhe mund ta konfirmoj, që më shumë se kurrë janë sot me Kosovën me FSK-në, me perspektivën e Kosovës për t’i dhëne mandatin kushtetues ushtrisë së Kosovës. Ushtri që e kem, por që duhet t’i japim mandatin kushtetues”, tha Haradinaj.
Ndërsa tha se përcaktimi drejtë NATO-s është legjitim dhe në përputhje të plotë dhe me interesin e komunitetit jo shumicë që jetojnë në Kosovë dhe se i garanton dhe serbët e Kosovës.
Haradinaj: Përcaktimi ynë drejt NATO-s, është legjitim
“Përcaktimi ynë me shku drejt NATO-s është një përcaktim legjitim. Ky përcaktim i dedikohet të gjithëve që jetojnë në Kosovë. Gjithë qytetarëve. Ky përcaktim është në përputhje të plotë me interesin e komuniteteve jo shumicë që jetojnë në Kosovë. Ky përcaktim i garanton edhe serbet e Kosovës. Pra sjellë me shumë siguri. Rekrutimi pjesëmarrja e qytetarëve serb të Kosovës në FSK, është nga ana e secilit është investim i qytetarit në sigurinë e shoqërisë në të cilën jeton. Kjo është një arritje e madhe. Jam i bindur qe FSK do ta vazhdon këtë perspektive të rritjes së besimit dhe te komuniteti serb ashti sikurse është në proces të mirë”, tha kryeministri Haradinaj.
Ndërsa ministri i FSK-së Rrustem Berisha tha se nga kryeministri Haradinaj kanë marrë shumë obligime dhe detyra, duke u shprehur i bindur se të gjitha do t’i realizojnë.
Berisha: Nga kryeministri morëm shumë detyra, të gjitha do t’i realizojmë
“Ne zotin Haradinajn e njoftuam për së afërmi me të arriturat e FSK-së, me aktivitetet, proceset të cilat i kemi kaluar deri tani. Për procesin e transformimit të FSK-së në forca të armatosura dhe i bëmë një prezantim, ku kemi qene, ku jemi dhe cilat janë sfidat qe na presin në të ardhmen...Nga kryeministri morëm shumë obligime, shumë detyra. Por jam mesë i bindur se bashkërisht me stafin e FSK-së, me FSK të gjitha këto do t’i realizojmë”, tha ai.
Kjo ishte vizita e parë e Haradinajt në FSK pasi që mori detyrën e kryeministrit.
