Gjykata e Apelit ende nuk ka dhënë vendim për masën e sigurisë ndaj Enver Sekiraqës, përkundër se të martën bëhen një javë nga seanca dëgjimore në të cilën Prokuroria e EULEX-it kërkoi mbajtjen e tij në burg, derisa vetë i dënuar me 37 vjet burgim për nxitje të vrasjes kërkoi falje se shkeli ndalesat e arrestit shtëpiak, gjatë më shumë se 24 orëve në liri. Apeli konfirmon se vendimi do të nxirret gjatë kësaj jave.
Kosovare Kelmendi, avokate e Enver Sekiraqës, thotë se është duke pritur çdo minutë që trupi gjykues i Gjykatës së Apelit, i përbërë nga dy gjyqtarë të EULEX-it dhe një vendor, ta njoftojnë për masën e sigurisë ndaj klientit të saj të dënuar me 37 vjet burgim për nxitje të vrasjes së policit Triumf Riza.
Ajo të hënën konfirmoi se ende nuk ka vendim të ri të Apelit, dhe se nuk dëshiron të paragjykojë çfarë mund të jetë ky vendim, ani pse i njëjti trup gjykues 11 ditë më parë e la të lirë në arrest shtëpiak Sekiraqën.
“Ne në çdo moment jemi duke e pritur vendimin e EULEX-it. Që nga java e kaluar po e presim”, tha Kelmendi përmes telefonit.
Gjykata e Apelit ka konfirmuar se vendin për Sekiraqën do ta nxjerrë gjatë kësaj jave.
“Gjykata e Apelit e ka shtyrë për këtë javë vendimin lidhur me ankesën kundër aktgjykimit dhe vendimin mbi masën e paraburgimit”, ka thënë Arbër Jashari, zëdhënës në Apel.
Enver Sekiraqa më 19 të këtij muaji u lëshua në arrest shtëpiak me një vendim të Gjykatës së Apelit. Por, i njëjti u kthye pas më shumë se 24 orësh në burgun e Dyzit, pasi shkeli disa nga ndalesat që gjykata i kishte caktuar në vendimin për ndryshim të masës së sigurisë ndaj tij.
Sekiraqa e kishte të ndaluar të takonte persona tjerë, përveç atyre me të cilët banonte, gjatë kohës sa ishte në arrest-shtëpiak. Por, pak kohë pasi u lira në rrjete sociale u shpërndanë fotografi të tij me persona tjerë jashtë familjes, të cilat u publikuan.
Për këtë, të martën që shkoi, vetë Enver Sekiraqa kërkoi falje në gjykatë, duke pretenduar se nuk ishte në dijeni për ndalesat e gjykatës. Edhe avokatja e tij Kosovare Kelmendi i pranoi gjykatës se klienti i tij ka shkelur ndalesat, por tha se ajo s'e kishte informuar atë në kohën kur ndodhën shkeljet, pasi ende s'e kishte marrë vendimin e shkruar për lirim të Sekiraqës.
Nga ana tjetër, në të njëjtën seancë dëgjimore, Prokurori i EULEX-it i tha trupit gjykues të Apelit se natën kur Sekiraqa u kthye në Dyz, një i burgosur tjetër kishte dëgjuar një bisedë të Enver Sekiraqës për planet e tij për arratisje.
Derisa Enver Sekiraqa është duke e pritur vendimin e ri të Gjykatës së Apelit për masën e sigurisë ndaj tij, lirimi i një të dënuari me 37 vjet burgim në arrest shtëpiak është konsideruar skandaloz, dhe ka nxitur reagime të njohësve të ligjit, e për më tepër edhe të një ambasadoreje kosovare.
Vlora Çitaku, nga SHBA-ja, tha se në vitet ’90 femrat në Prishtinë kishin më shumë frikë nga “krimineli që u la i lirë nga gjyqtarë të EULEX-it dhe të Kosovës”, derisa njohësit e drejtësisë konsideruan se Apeli shkeli paragrafin e dytë të Nenit 367 të Kodit të Procedurës Penale të Kosovës, kur liroi një të dënuar me 37 vjet burgim.
“Nëse gjyqtari i vetëm ose trupi gjykues shqipton dënim prej pesë (5) ose më shumë vjet burg të akuzuarit ia cakton paraburgimin, nëse ai nuk gjendet në paraburgim, ose ia vazhdon atë kur i akuzuari gjendet në paraburgim”, specifikohet në paragrafin 2 të Nenit 367 të Kodit të Procedurës Penale.
Por, për vendimin e gati para dy jave, EULEX ende nuk është deklaruar. Për më tepër ky mision ndërkombëtar sugjeron që të kërkohen shpjegime në Gjykatën e Apelit të Kosovës, përkundër se vendimi është dhënë nga dy gjyqtarë të saj dhe një vendor.
