Kryetari i Lëvizjes Vetëvendosje Visar Ymeri, ka konfirmuar se Gjykata Themelore në Prishtinë, ua ka caktuar nga një muaj paraburgim deputetëve të arrestuar të VV-së, Albulena Haxhiut, Donika Kada-Bujupit dhe Albin Kurtit.
Ymeri, përmes një postimi në Facebook, ka thënë se gjyqtari Beqir Kalludra, ka dënuar edhe dje aktivistët e VV-së, pa prova, përcjell Bota sot.
Ai ka thënë se deputetët e Vetëvendosjes, po persekutohen.
Më poshtë reagimi i plotë i Ymerit:
30 ditë paraburgim për deputetët, Albulenën, Donikën dhe Albinin. Prapë Beqir Kalludra.
Prapë Klani Pronto me shokë e paterica.
Të njëjtit që dje i dënuan aktivistët pa asnjë faj. Pa asnjë provë a bazë.
Të njëjtit që po duan t'ua vjedhin fitoren qytetarëve në zgjedhjet lokale.
Persekutimi është i drejtuar kundër VETËVENDOSJE!-s. Sepse vetëm VETËVENDOSJE!-n e kanë pengesë në ndërmarrjen e tyre kriminale. Sepse janë kundër vullnetit popullor.
Dhe pengesë do të na kenë. Përjetësisht. Kundër krimit.
Liri për deputetët.
Liri për aktivistët./BS