Shpend Ahmeti njoftoi sot se ekipet që merren me mirëmbajtjen e rrugëve janë duke punuar për pastrimin e rrugëve, teksa ende nuk ka dhënë qëndrim për situatën e krijuar brenda Lëvizjes Vetëvendosje.
Kryetari i Komunës së Prishtinës shkroi në rrjetin social Facebook se rrugët e komunës janë të kalueshme, pavarësisht borës që ka rënë të shtunën.
“Ekipet për mirëmbajtjen e rrugëve janë duke punuar në terren, dhe pavarësisht reshjeve të mëdha të borës, të gjitha rrugët kryesore janë të kalueshme”, tha Ahmeti.
E shkrimi i Ahmetit për borën dhe rrugët, nuk i bëri shumë përshtypje komentuesve dhe simpatizantëve të Lëvizjes Vetëvendosje. Ata i kërkuan atij që të jepte një qëndrim për përçarjen brenda Lëvizjes Vetëvendosje, ku para disa ditësh Aida Dërguti e kishte quajtur “m**” ish-kreun e partisë, Albin Kurti.
“Shpend, si një aktivist i thjeshtë po të lutem të deklarohesh rreth rastit Kurti – Derguti & Molliqaj. Të gjithë besojmë se je në anën e duhur, por na duhet një siguri”, i thotë aktivsti i VV-së Korab Muhadri, Shpend Ahmetit në Facebook.
Pati edhe nga ata simpatizantë që i kërkuan Ahmetit t’i dalë në mbrojtje Albin Kurtit, pas ofendimit që pranoi nga Aida Dërguti.
