Adnan Rrustemi, Kryesues i Komisionit Zgjedhor të Lëvizjes Vetëvendosje, raportoi për procesin e rezultateve të zgjedhjeve të brendshme të Lëvizjes Vetëvendosje që u mbajtën dje për kryetar të VV-së.
Albin Kurti është zgjedhur kryetar i VV-së me mbi 10 mijë vota apo 33.83 për qind të votave të anëtarëve.
Numri i përgjithshëm i anëtarëve me të drejtë vote ishte mbi 33 mijë.
“Albin Kurti u zgjodh kryetar i VV-së. Rezultatet paraprake ishin për: 98.82%, kundër 0.61%, abstenim 0.57% dhe të pavlefshme 0.26%”, tha ai.
Adnan Rrustemi, ka thënë se krahasuar me vitin 2015 kur ishte zgjedhur kryetar Visar Ymeri, është shënuar rritje e daljes në zgjedhje të partisë. Më 2015 kishin votuar 27,43 % të anëtarëve.
“Nga 2015 numri total është rritur për 60 për qind, ndërsa numri i anëtarëve mbi 100 për qind. Pra gjithsej 10 mijë e 606 të anëtarësisë së VV-së kanë dalë në zgjedhje”, tha Rrustemi.
Kujtojmë se dje ish-aktivistja e Lëvizjes Vetëvendosje, Teutë Rrusta, ka kritikuar partinë se po vonon numrin e anëtarëve të cilët morën pjesë në zgjedhjet e sotme për kryetar.
Ajo ka thënë se Lëvizja Vetëvendosje ka rreth 30 mijë anëtarë, por në zgjedhje beson se nuk morën pjesë as 30 për qind e tyre.
