Pacolli takon Kotzias: Do të hapet zyra e Kosovës në Athinë
Ministri i jashtëm i Kosovës Behgjet Pacolli po qëndron në vizitë zyrtare në Greqi.
Në ministerialin e disa vendeve të Europës qendrore dhe Ballkanit Perëndimor, ai u takua edhe me Niko Kotzias, minister i jashtëm i Greqisë.
Sipas njoftimit të Pacollit, ai u dakordua me Kotzias për hapjen e zyrës së Kosovës në Greqi./BS
Postimi i plotë i Begjet Pacollit
Gjatë qëndrimit tim në Sunion të Greqisë për ministerialin e disa vendeve të Europës qendrore dhe Ballkanit Perëndimor, kalova shumë kohë me nikoqirin tim, Niko Kotzias.
U dakorduam që shumë shpejt Zyra e Kosovës të çelet në Athinë. Shpreha keqardhjen që në një aktivitet kaq të rëndësishëm ku kishte disa zëvendëskryeministra dhe ministra të jashtëm si ai i Çekisë, Polonisë, Kroacisë, Greqisë, Hungarisë, Bosnjës, Maqedonisë, etj, Serbia nuk ishte e pranishme, me gjasë shkaku i pranisë sime dhe Kosovës si e barabartë.
Ministri Kotzias na bëri mua dhe kolegëve për një pjesë të kohës ciceronin në një vizitë që bëmë në Tempullin e Poseidonit, një dëshmi impozante e qytetërimit të Greqisë së Lashtë.