(E plotësuar)- Shoqata “Miqtë e Amerikës” bashkë me Gardën Ceremoniale të FSK-së e kanë ngritur flamurin amerikan në bulevardin “Bill Clinton” në Prishtinë me rastin e 242- vjetorit të pavarësisë së Amerikës.
Dita kombëtare e shtetit amerikan në mënyrë simbolike po festohej edhe nga dy fëmijë të cilët kishin veshur bluza me stemën e flamurit të SHBA-së.
Kryetari i Shoqatës “Miqtë e Amerikës”, Agim Rexhepi, u shpreh se qëllimi i këtij organizimi është dërgimi i mesazhit falënderues për shtetin amerikan, pa kontributin e të cilit Kosova nuk do të gëzonte lirinë dhe pavarësinë.
Rexhepi: Derisa ju festoni, festojmë edhe ne
“ Ne u jemi falënderues veprimet tona janë edhe është në atë drejtim që me dërgua qytetarit të thjesht amerikan edhe institucioneve normalisht që derisa jeni duke festuar ju, një popull në Kosovë po e feston festën e juaj ashtu siç e festojmë festën tonë, normalisht ne i respektojmë vlerat tona, festën tonë mirëpo njëkohësisht e festojmë edhe festën e Amerikës, aleatit tonë strategjik”, tha ai.
Hajrush Kurtaj, drejtor i departamentit për bashkëpunim civil dhe ushtarak pranë Ministrisë së Forcës dhe Sigurisë së Kosovës, duke uruar popullin amerikan në këtë ditë të pavarësisë së saj, tha se SHBA ka bërë shumë për Kosovën dhe shtet ndërtimin e saj.
Kurtaj: Amerika ka bërë shumë për popullin e Kosovës
“Amerika ka bërë shumë për popullin e Kosovës, për Kosovën si para lufte edhe në luftë por edhe tani rreth shtet ndërtimit, Shtetet e Bashkuara të Amerikës kanë rol të veçantë dhe jashtëzakonisht të mirë në shtet ndërtimin e Kosovës. Edhe njëherë urime gjithë popullit amerikan ditën e pavarësisë së Amerikës”, tha Kurtaj.
Ndërsa ushtari amerikan nga Ajova James Grimaldi duke falënderuar për organizimin e kësaj ceremonie në nder të 242-vjetorit të pavarësisë së Amerikës, u shpreh se Kosova ka shumë për të kaluar, por që do e ketë mbështetjen e shtetit amerikan.
Grimaldi: Kosova ka shumë për të kaluar
“Amerika e shpalli pavarësinë e saj shumë kohë më parë dhe ardhja ime në një vend , i cili shpalli pavarësinë e tij kohët e fundit do të thotë shumë për mua dhe e gjallëron frymën dhe besimin tim për të ardhmen. Kemi kaluar nëpër shumë beteja, Kosova ka shumë më tepër për të kaluar, por unë jam i emocionuar për të ardhmen tuaj dhe Amerika dhe shteti im, shteti i Iowa-s do t’iu ndihmojnë juve si miq në çdo hap të rrugës”, tha Grimaldi.
Në shenjë falënderimit ndaj shtetit amerikan për kontributin e dhënë për lirinë dhe pavarësisë së Kosovës, kori “Nexhmie Pagarusha” interpretoi disa pika muzikore.
Ndryshe, më 4 korrik të vitit 1776, delegatët e 13 kolonive britanike të Amerikës nënshkruan Deklaratën e Pavarësisë, e cila thuhet se ishte shkak i Revolucionit Amerikan. Ky dokument u hartua kryesisht nga 32-vjeçari Tomas Xheferson
Në Kosovë festohet pavarësia e SHBA-ve (Drejtpërdrejt)
Për nder të 4 korrikut, 242 vjetorit të Pavarësisë së SHBA-ve, shoqata “Miqtë e Amerikës” në bashkëpunim me FSK-në organizojë një sërë aktivitetesh.
Ngjarja po mbahet në sheshin “Bill Klinton”.
