Kompania gjermane që prodhon pajisje për automjete “Bosch” njoftoi sot se do të paguajë në SHBA 327,5 milionë dollarë (rreth 305 milionë euro) si dëmshpërblim tek përdoruesit dhe shitësit e veturave në kuadër të skandalit “Volkswagen” me motorë diesel të trukuar.
“Bosch ka arritur me palët akuzuese një marrëveshje në SHBA për zgjidhjen e shumicës së padive civile në lidhje me veturat diezel të markave Volkswagen, Audi dhe Porsche”, njoftoi grupi gjerman.
“Bosch” akuzohet se ka ndihmuar “Volkswagen” të fshehë ekzistencën e pajisjes së paligjshme që ai vetë e kishte furnizuar.
Kjo pajisje i mundësonte 11 milionë veturave në botë që gjatë kontrolleve të dilnin më pak ndotëse nga realiteti.
