Kurdët sirianë nuk janë ftuar në negociatat politike që do të mbahen në fund të janarit në Kazakistan nën drejtimin e Rusisë dhe Turqisë, theksoi sot zyrtari i zyrës së përfaqësisë së Rojavas (emri i Kurdistanit në gjuhën siriane) në Paris, Khaled Issa.
“Ne nuk jemi ftuar në Astana. Duket që ekziston një veto kundër pranisë sonë”, deklaroi Issa, i cili është gjithashtu anëtar i PYD-së (Partia e Bashkimit Demokratik).
PYD-ja kundërshtohet ashpër nga Turqia, që e konsideron si një grup terrorist të lidhur me PKK-në (Partia e Punëtorëve të Kurdistanit) në luftë kundër shtetit turk që prej 30 vitesh.
Negociatat për Sirinë do të mbahen në fund të muajit janar në Astana nën drejtimin e Moskës dhe Ankarasë, nismëtare të një armëpushimi të përgjithshëm hyrë në fuqi që prej 30 dhjetorit në territorin sirian, edhe pse luftimet vazhdojnë, veçanërisht pranë Damaskut.