Paralajmërimi për shpërthimin e një vullkani në malin Agung në Bali ishte dhënë prej kohësh, ndërkohë që tani, linjave të transportit ajror u është dhënë “alarmi i kuq”, për shkak të rrezikut që shfaq hiri vullkanik, pas lëshimit të një reje të dendur tymi që arriti deri në 4.000 m lartësi.
Ky është shpërthimi i dytë më i madh nga ishulli-vullkan i Indonezisë brenda kësaj jave, ndaj dhe shumë fluturime janë ndalur, shtyrë ose devijuar.
“Paralajmërimi i kuq” nënkupton se shpërthimi i këtij vullkani është një pritshmëri e pashmangshme tashmë, me re të dendura tymi që mund të dalin nga maja e malit Agung. Autoritetet kanë nisur edhe shpërndarjen e maskave mbrojtëse, pasi vunë re shtëllungën e tymit.
Bali është një destinacion tepër i rëndësishëm turistik, edhe pse vendet më të frekuentuara nga turistët e huaj janë Kuta dhe Seminyak, që ndodhen rreth 70 km larg vullkanit.
Aeroporti kryesor i ishullit për momentin thuhet se po operon normalisht, por gjithsesi disa linja ajrore kanë anuluar fluturimet e tyre. Hiri vullkanik mund të shkaktojë dëmtimin e motorëve të avionëve. Për këtë arsye, aeroporti kryesor ndërkombëtar në ishullin Lombok, në lindje të Balit, është mbyllur tërësisht.
“Turizmi në Bali është ende i sigurtë, me përjashtim të zonës së rrezikshme përreth malit Agung”, thuhet në deklaratën e lëshuar nga Agjencia për Zbutjen e Fatkeqësive në Indonezi. Ajo shtoi se njerëzit brenda rrezes prej 7.5 km përreth zonës së rrezikshmërisë së lartë “duhet të evakuohen menjëherë” por pa ngritur kambanat e alarmit, duke theksuar “në mënyrë të qetë dhe të kujdesshme”.
Rreth 25 mijë persona thuhet të jenë vendosur nëpër strehëza të përkohshme, ndërsa gjatë këtij viti janë larguar rreth 140 mijë njerëz në total.
