Kampioni në fuqi i Kosovës, klubi i basketbollit Sigal Prishtina, reagon ashpër ndaj Komunës së Prishtinës. Sigal Prishtina nesër (18.30) do të takohet me klubin nga Bjellorusia, Tsmoki Minsk, në ndeshjen që luhet në Qendrën e Rinisë dhe të Sportit në Prishtinë, në kuadër të kualifikimeve për Champions League. Me një fjalë Prishtina rroket me Komunën e Prishtinës për shumë aspekte. Ja reagimi i plotë i KB Sigal Prishtina: “(N'a vjen shumë keq që duhet të reagojmë për tema kaq banale, një ditë para ndeshjes më të rëndësishme të Prishtinës në histori të klubit)
Sigal Prishtina: Komuna “krenohet” me sukseset tona, ndërsa n’a sulmon kur i kërkojmë përkrahje
Komuna e Prishtinës, përveçse nuk po e përkrahë Klubin e Basketbollit “Sigal Prishtina”, me qasjen e saj të papërgjegjshme po i dekurajon edhe basketbollistët dhe tifozët tanë, që kryeqytetit i kanë sjellë dhjetëra kupa si kampionë.
Në vend se për sportistët që na bredhin rrugëve të mundohet të krijojë kushte dhe hapësirë sportive, qeverisja e Prishtinës po mundohet ta politizojë edhe klubin me më së shumti trofe në Kosovë.
Komuna e Prishtinës, e cila është shndërruar në strehë për militantë partiakë dhe më së paku po qeveriset nga prishtinasit, duke u munduar t’i shmanget përgjegjësisë për mospërkrahjen e klubit, tash po përpiqet që gjithçka ta personalizojë dhe shndërrojë në betejë politike me presidentin e KB Sigal Prishtina, Blerand Stavileci, i cili është një prej njerëzve më meritorë për sukseset e klubit, i cili që nga viti 1994 është pjesë e klubit si lojtar, kapiten, drejtor i shkollës, drejtor sportiv dhe tash kryetar i klubit. Nën presidencën e Blerandit klubi për 4 vjet i ka fituar hiç më pak se 32 trofe. Një rekord absolut. Emri i Prishtinës është futur në hartën e klubeve serioze dhe Prishtina si destinacion i sportistëve të mirë.
Përmes një zëdhënësi, që qenka nga Gjilani, sigurisht tifoz i Dritës ose Gjilanit, i cili paska shpërfaqur injorancën e tij duke mos pasur as informacione elementare për KB Sigal Prishtinën, sepse as pozitën që mban Blerand Stavileci në klub nuk e dinte, Komuna e Prishtinës vetëm sa e paska konfirmuar edhe një herë se as që i interesojnë sportistët dhe se për ta gjithçka është vetëm politikë.
Drejtor i Klubit të Basketbollit “Sigal Prishtina” është Florian Miftari, po ashtu njëri nga ikonat e klubit dhe bashkëlojtar i Blerandit, ndërsa kur me sukseset tona i bëjmë të krenohen gjithë prishtinasit, nuk mungojnë asnjëherë deklaratat e udhëheqësve të Komunës së Prishtinës gjoja se edhe ata i gëzohen sukseseve tona, njëjtë sikurse prishtinasit, mirëpo krejt e kundërta ndodhë kur vjen puna te përkrahja e tyre, sepse gjithmonë shmangen dhe krijojnë distancë për shkak të betejave të tyre politike.
Pra, në suksese na trajtojnë si klub të prishtinasve, kurse kur u kërkohet përkrahje shmangen me qasje politike.
Klubi më i trofeshëm i basketbollit në Kosovë, “Sigal Prishtina”, kërkon nga të gjithë adhuruesit e basketbollit dhe të të gjitha sporteve në Prishtinë, që të bëhemi bashkë dhe njëzëri të kërkojmë kushte më të mira për sportistët tanë. E këtij zëdhënësi të imponuar i dëshirojmë fat me klubet e tij të zemrës nga Gjilani”.
