LIVE: Ukraina në “situatë të vështirë”, edhe ky shtet po kërcënohet nga Rusia – ushtarakët amerikanë fillojnë përgatitjet!

Ndërsa Rusia intensifikon ofensivën e saj në Ukrainën lindore, zyrtarët e komandës amerikane në Evropën Lindore thonë se është urgjentisht e nevojshme që NATO-ja të jetë e gatshme për një konfrontim të mundshëm. Korrespondentja e Zërit të Amerikës në Evropën Lindore, Myroslava Gongadze, bisedoi me komandantë amerikanë dhe polakë gjatë një ceremonie për transferimin e komandës amerikane në qytetin Boleslawiec të Polonisë.

Në kuadër të misionit në Evropën Lindore, ushtria amerikane ka vendosur dhjetë mijë trupa në Poloni, vija e parë e frontit të NATO-s. Këtë javë, Divizioni i Parë i Kalorësisë i Ushtrisë Amerikane mori kontrollin e bazës nga Divizioni i 3-të i Këmbësorisë.

Ushtria amerikane po punon ngushtë me aleatët e NATO-s për të frenuar armikun. Në vitin 2020, ajo riaktivizoi Korpusin e Pestë, duke intensifikuar komandën dhe kontrollin për forcat aleate dhe partnere në Evropë.

Gjenerali Charles Costanza, i cili kohët e fundit mori drejtimin e Korpusit të Pestë, thotë se Rusia përbën një kërcënim afatshkurtër për NATO-n.

“Mendoj se ka pak keqkuptim, se ne kemi kohë dhe se Rusia ka pësuar shumë humbje dhe se do t'u duhet shumë kohë për t’u organizuar. Unë nuk i ndaj këto pikëpamje. Mendoj se duhet të jemi gati në një afat të afërt”.

Zyrtarët ukrainas dhe njoftimet e zbulimit perëndimor thonë se humbjet e Rusisë në Ukrainë kanë qenë të rënda, rreth 50,000 trupa të vrarë në betejë.

Por Gjenerali Costanza thotë se forcat ruse po rindërtohen me shpejtësi dhe ndërsa nuk janë trajnuar aq mirë sa trupat e NATO-s, Rusia ka shtuar numrin e trupave që nga fillimi i agresionit në Ukrainë.

“Ata janë modernizuar dhe kanë nxjerrë mësime nga lufta në Ukrainë, çka do të përbëjë problem për ne në Perëndim, pasi Ukraina përdor teknika dhe armatime perëndimore. Rusia po mëson se si t’i mposhtë ato”.

Gjenerali thekson nevojën urgjente që NATO-ja të jetë e gatshme. Partnerët polakë pajtohen me vlerësimin dhe shprehim mirëseardhjen për trupat amerikane.

Rusia ka përbërë gjithmonë kërcënim për Poloninë. Komandanti i Divizionit të 11-të të ushtrisë polake, Gjeneral Piotr Fajkowski, thotë se të gjithë aleatët e NATO-s tani e njohin rrezikun që përbën Rusia.

“Kur Rusia pushtoi Ukrainën, asaj i ranë maskat dhe tani dimë gjithçka. Rusia tregon se si mendon, si vepron dhe tani gjithçka është e qartë”.

Gjenerali thekson rëndësinë e vendosjes së trupave amerikane në Poloni si një mjet frenimi.

“Duhet të jemi gati që t'u tregojmë rusëve se jemi të përgatitur dhe nuk kanë asnjë mënyrë për të na sulmuar. Nëse sulmoni madje edhe vendin më të vogël si Letoninë apo Estoninë, ne jemi gati të përballemi me kërcënimin”.

Drejtuesit ushtarakë polakë theksojnë se gjatë historisë dhe për shkak të pozitës gjeografike në zemër të Evropës, vendit të tyre shpesh i është dashur të luftojë i pari. Për këtë arsye, Polonia shpenzon për mbrojtjen pothuajse 4% të prodhimit të brendshëm.

Polonia nxori mësime të dhimbshme nga pushtuesit nazist gjatë Luftës së Dytë Botërore dhe dominimit sovjetik që pasoi për vite me radhë.

Ofrimi i mbështetjes për Ukrainën dhe ndihma për trajnimin e ushtarëve ukrainas janë shenja që Polonia ka zgjedhur të vërë në punë mësimet e dala nga luftërat e kaluara për të shmangur mizori të reja./VOA

“Ne po bëjmë gjithçka për të arritur paqen, është një objektiv që kërkojmë ta arrijmë si në Ukrainë ashtu edhe në Izrael.

Në Ukrainë ne ndihmojmë Kievin të mbrohet pikërisht sepse duam të arrihet paqja. Nëse do të kishte një humbje ushtarake të Ukrainës, Rusia kurrë nuk do të ulet në një tryezë për paqen, por do të përpiqet të vendosë kushtet e saj,

Është e qartë se ne nuk jemi në luftë me Rusinë, ne nuk do të dërgojmë asnjë ushtar për të luftuar".

Kështu ka deklaruar zëvendëskryeministri dhe ministri i jashtëm Antonio Tajani në margjinat e një nisme elektorale në Livorno.

“Pozicioni i Italisë është ai i NATO-s dhe BE-së. Në takime askush nuk foli për dërgimin e ushtarëve. Sigurisht që Italia nuk do të dërgojë kurrë ushtarë sepse ne nuk jemi në luftë me Rusinë.

Duke mbrojtur Ukrainën është tjetër gjë”.

Rusia përshëndet çdo nismë paqeje për Ukrainën, kjo temë do të diskutohet gjatë bisedimeve në Kinë, tha sekretari i shtypit presidencial rus Dmitry Peskov.

“Ukraina do të diskutohet me siguri. Në përgjithësi, ne përshëndesim çdo iniciativë paqeje dhe, natyrisht, Moskës i pëlqen vizioni i palës kineze për perspektivat e mundshme, bazat e mundshme për përpjekjet për të zgjidhur situatën,” tha ai në një intervistë me Ren- TV.

Ai theksoi se një diskutim i nxehtë është përpara.

“Ne e dimë situatën në palën ukrainase, e cila përjashton çdo bisedë për vete edhe nga pikëpamja ligjore. Pra, procesi do të jetë i gjatë, por ne na pëlqen qëndrimi konstruktiv i palës kineze,” shtoi ai.

Presidenti ukrainas Volodymyr Zelensky thuhet se ka udhëtuar për në Kharkiv të enjten, disa ditë pasi Rusia hapi një front të ri në luftë me një inkursion përtej kufirit në veri të rajonit.

Sipas mediave të huaja, Zelensky bëri një postim në Telegram për të thënë se kishte mbajtur një takim atje me liderë të lartë.

“Nga sot, situata në rajonin e Kharkiv është përgjithësisht nën kontroll, ushtarët tanë po i shkaktojnë humbje të konsiderueshme okupatorit. Por drejtimi mbetet jashtëzakonisht i vështirë – ne po forcojmë njësitë tona”, citohet të ketë shkruar Zelensky.

Ai tha se gjatë takimit, i cili përfshinte komandantin e përgjithshëm Oleksandr Syrskyi, diskutimet përfshinin “në detaje perspektivat e situatës luftarake, kërcënimet në ditët dhe javët e ardhshme dhe mundësitë tona, ukrainase, për t’iu kundërvënë planeve sulmuese ruse”.

Vizita e tij vjen në kohën kur ushtria ukrainase tha se veprimet e saj mbrojtëse i kishin detyruar trupat ruse të zvogëlojnë ritmin e ofensivës së tyre në veri të rajonit të Kharkiv të enjten.

Ushtria tha se ka vazhduar luftimet në pjesën veriore të qytetit Vovchansk në rajonin e Kharkiv, me situatën nën kontroll, raporton Reuters.

Ndërkohë Instituti për Studimin e Luftës (ISW) tha në një raport të botuar dje se nuk besonte se forcat ruse kishin avancuar më shumë se tetë kilometra brenda Ukrainës nga kufiri rus me inkursionin e saj të ri në veri.

AFP citoi një zëdhënës ushtarak ukrainas të thoshte “Situata në sektorin e Kharkiv mbetet e ndërlikuar, por po evoluon në një mënyrë dinamike. Forcat tona të mbrojtjes e kanë stabilizuar pjesërisht situatën. Përparimi i armikut në zona dhe lokalitete të caktuara është ndalur”.

Ai raportoi se forcat ruse “gjithmonë po përpiqeshin të krijonin kushte për përparime të reja” dhe shtoi se trupat e Kievit “po përpiqeshin të stabilizonin situatën, të shkaktonin dëme dhe të parandalonin armikun të fitonte terren”.

Presidenti rus Vladimir Putin falënderoi udhëheqësin kinez Xi Jinping për përpjekjet e tij për të zgjidhur konfliktin e Ukrainës gjatë një takimi në Pekin të enjten.

Takimi i sotëm ishte një tjetër konfirmim i marrëdhënies miqësore “pa kufij” që ata nënshkruan në vitin 2022, pak para se Rusia të niste sulmin e saj kundër Ukrainës.

Vizita shtetërore dy-ditore e Presidentit rus tek një nga aleatët e tij më të fortë vjen ndërsa forcat e vendit të tij po bëjnë një ofensivë në rajonin e Kharkivit në Ukrainën verilindore.

“Të dyja palët duan të tregojnë se pavarësisht asaj që po ndodh globalisht, pavarësisht trysnisë me të cilën të dyja palët po përballen nga Shtetet e Bashkuara, ato nuk do t'i kthejnë shpinën njëra-tjetrës”, thotë Hoo Tiang Boon, profesor i politikës së jashtme kineze në Universitetin Teknologjik ‘Nanyang’ të Singaporit.

Ndërsa të dy udhëheqësit thonë se po kërkojnë t’i japin fund luftës në Ukrainë, ata nuk ofruan detaje në deklaratat e tyre të enjten pasdite. Kina ka ndikim të madh si mbështetësi kryesor i Rusisë, ndërsa Moska po e vazhdon luftën në Ukrainë.

Pekini thotë se mban qëndrim neutral ndaj këtij konflikti, por i ka mbështetur pretendimet e Moskës se Rusia e nisi sulmin ndaj Ukrainës pasi u provokua nga perëndimi. Kina gjithashtu vazhdon të furnizojë me pajisje industrinë ruse të prodhimit të armëve.

Kina propozoi një plan paqeje në vitin 2023, por ai u refuzua nga Ukraina dhe perëndimi pasi nuk përfshinte largimin e trupave ruse nga pjesët e Ukrainës që janë marrë nën kontroll nga forcat ruse.

“Kina shpreson që Evropa t’i kthehet rrugës së paqes dhe stabilitetit dhe Pekini do të vazhdojë të luajë një rol konstruktiv drejt kësaj”, tha Presidenti Xi, duke folur krahas homologut rus.

Kjo deklaratë i bëri jehonë asaj që Kina tha vitin e kaluar kur ofroi për herë të parë një plan për paqen, duke ofruar parime të përgjithshme për përfundimin e luftës në Ukrainë.

Presidenti Putin tha se do të informojë udhëheqësin kinez me detaje për “situatën në Ukrainë” dhe shtoi se “ne çmojmë iniciativën e kolegëve dhe miqve tanë kinezë për të përmirësuar situatën”. Ai shtoi se të dy udhëheqësit planifikonin të angazhoheshin në diskutime të mëtejshme rreth politikës së jashtme në një takim jozyrtar që do të mbahet më vonë të enjten.

Ndërsa Rusia filloi një ofensivë të re në Ukrainë javën e kaluar, lufta 2-vjeçare ka hyrë në një fazë kritike, pasi ushtria e Ukrainës ende pret për furnizime të reja me raketa anti-ajrore dhe predha artilerie nga Shtetet e Bashkuara.

Para mbajtjes së fjalimeve, të dy udhëheqësit nënshkruan një deklaratë për thellimin e partneritetit gjithëpërfshirës strategjik në 75-vjetorin e vendosjes së marrëdhënieve diplomatike mes tyre.

Rusia është bërë gjithnjë e më shumë e varur ekonomikisht nga Kina pasi sanksionet perëndimore për shkak të luftës në Ukrainë ia ndërprenë Moskës qasjen në pjesën më të madhe të sistemit tregtar ndërkombëtar. Rritja e tregtisë së Kinës me Rusinë, që vitin e kaluar arriti shifrën e 240 miliardë dollarëve, e ka ndihmuar Moskën të zbusë disa nga pasojat e sanksioneve.

Moska e ka devijuar pjesën më të madhe të eksporteve të saj të energjisë drejt Kinës dhe është mbështetur te kompanitë kineze për importimin e pajisjeve për industrinë ushtarake për të shmangur sanksionet perëndimore.

“Unë dhe presidenti Putin jemi dakord, ne duhet të kërkojmë aktivisht për pika me interes të përbashkët për të dy vendet, për të zhvilluar avantazhet e secilit dhe forcuar bashkëpunimin për përmbushjen e interesave të përbashkëta”, tha Presidenti Xi.

Në takim presidenti kinez përgëzoi homologun Putin për zgjedhjen e tij në një mandat të pestë në detyrë dhe festoi 75 vjetorin e marrëdhënieve diplomatike midis ish-Bashkimit Sovjetik dhe Republikës Popullore të Kinës, e cila u krijua pas luftës civile në vitin 1949. Presidenti Putin nuk pati kundërshtarë të besueshëm në garën presidenciale dhe, ashtu si Presidenti Xi, nuk ka paraqitur ndonjë plan për ndonjë pasardhës të mundshëm.

Në prag të vizitës, Presidenti Putin tha në një intervistë për mediat kineze se Kremlini është i përgatitur për të negociuar për konfliktin në Ukrainë. “Ne jemi të hapur për një dialog mbi Ukrainën, por negociata të tilla duhet të marrin parasysh interesat e të gjitha vendeve të përfshira në konflikt, duke përfshirë edhe tonat”, citohet të ketë thënë Presidenti Putin nga agjencia zyrtare kineze e lajmeve ‘Xinhua’.

Presidenti Putin tha se propozimi kinez i bërë në vitin 2023, të cilin Ukraina dhe Perëndimi e refuzuan, mund të “vendosë bazat për një proces politik dhe diplomatik që do të merrte parasysh shqetësimet e sigurisë së Rusisë dhe do të kontribuonte në arritjen e një paqeje afatgjatë dhe të qëndrueshme”.

Presidenti ukrainas Volodymyr Zelenskyy ka thënë se çdo negociatë duhet të përfshijë rivendosjen e integritetit territorial të Ukrainës, tërheqjen e trupave ruse, lirimin e të gjithë të burgosurve, një gjykatë për ata që janë përgjegjës për agresionin dhe garancitë e sigurisë për Ukrainën.

Presidenti Putin ka fajësuar Perëndimin për dështimin e negociatave në javët e para të luftës dhe vlerësoi planin e paqes të Kinës.

Marrëdhëniet ushtarake Rusi-Kinë janë forcuar gjithashtu gjatë luftës në Ukrainë. Ata kanë mbajtur një sërë manovrash të përbashkëta luftarake në vitet e fundit, duke përfshirë stërvitje detare dhe kanë kryer së bashku patrullime me aeroplanë bombardues me rreze të gjatë mbi Detin e Japonisë dhe Detin e Kinës Lindore. Forcat tokësore ruse dhe kineze janë dërguar gjithashtu në territorin e vendit tjetër për stërvitje të përbashkëta.

Kina mbetet një treg i madh për ushtrinë ruse, ndërsa gjithashtu zgjeron industritë e saj mbrojtëse të brendshme, duke përfshirë ndërtimin e aeroplanmbajtësve dhe nëndetëseve bërthamore.

Presidenti Putin ka thënë më parë se Rusia ka ndarë teknologji shumë të ndjeshme ushtarake me Kinën që ndihmuan në forcimin e aftësive mbrojtëse të Kinës. Në muajin tetor të vitit 2019, ai tha se Rusia po ndihmonte Kinën të zhvillonte një sistem paralajmërimi të hershëm për të kapur raketat balistike, një sistem që përfshin radarët me bazë në tokë dhe satelitë që i kanë vetëm Rusia dhe Shtetet e Bashkuara./VOA

Presidenti Vladimir Putin tha se Kremlini është i gashmëm për të negociuar mbi konfliktin në Ukrainë, në prag të vizitës në Pekin, aleatit që ka mbështetur sulmin në shkallë të gjerë të Rusisë ndaj fqinjit të saj.

“Jemi të hapur për dialog mbi Ukrainën, por këto bisedime duhet të marrin parasysh interesat e të gjitha vendeve të përfshira në konflikt, përfshirë interesat tona”, citohet të jetë shprehur zoti Putin gjatë një intervistë për agjencinë kineze të lajmeve Xinhua të mërkurën.

Udhëtimi dyditor i zotit Putin, i cili fillon të enjten, ndodh në një kohë që trupat ruse po ndërmarrin një ofensivë në verilindje të Ukrainës.

Ofensiva që filloi javën e kaluar në rajonin e Kharkivit ështe sulmi i shpejtë dhe i papritur më i rëndësishëm që kur Moska nisi agresionin në 2022 dhe ka detyruar 8000 vetë që të largohen nga shtëpitë e tyre.

Bashkë me përpjekjet e Moskës për të fituar terren në rajonin e afërt te Doneskut, lufta dy vjeçare ka hyrë në një fazë kritike për Ukrainën që përballet me mungesa të mëdha, ndërsa pret furnizime të reja me armatime nga Shtetet e Bashkuara.

“Nuk i kemi refuzuar kurrë bisedimet”, u citua të jetë shprehur zoti Putin për agjencinë Xinhua.

“Ne po kërkojmë një një zgjidhje gjithëpërfshirëse, të qëndrueshme dhe të drejtë për konfliktin, përmes mjeteve paqësore. Ne jemi të hapur për një dialog mbi Ukrainën, por negociata të tilla duhet të marrin parasysh interesat e të gjitha vendeve të përfshira në konflikt, përfshirë edhe tonat”.

Presidenti i Ukrainës, Volodymyr Zelenskyy është shprehur se bisedimet duhet të përfshijnë rikthimin e integriteti territorial të Ukrainës, tërheqjen e trupave ruse, lirimin e të gjithë të burgosurve, ngritjen e një gjykate për të shqyrtuar ata që janë përgjegjës për agresionin si edhe garanci për sigurinë e Ukrainës.

Kina pretendon se mban qendrim neutral mbi konfliktin, por ka mbështetur qendrimin e Moskës se Rusia u provokua nga Perëndimi për të sulmuar Ukrainën, pavarësisht pohimeve publike të zotit Putin mbi dëshirën e tij për të rikthyer kufijte e vjetër të Rusisë, si arsye për agresionin.

Presidenti Putin ka fajësuar Perëndimin për dështimin e negociatave në javët e para të luftës dhe ka lavdëruar planin e paqes së Kinës mbi Ukrainën, i cili do t’i lejonte Moskës që çimentonte kontrollin në territoret që ka arritur të marrë nën kontroll gjatë luftës.

“Pekini propozon hapa praktikë dhe konstruktivë për të arritur paqe duke treguar përmbajtje nga përmbushja e interesave vetjake dhe nga përshkallzimi i vazhdueshëm i tensioneve, duke minimizuar ndikimin negativ të konflikit në ekonominë botërore”, tha ai.

Presidenti Putin tha se propozimi kinez në vitin 2023, të cilin Ukraina dhe Perëndimi e refuzuan “mund t’i kishte hapur udhë një procesi politik dhe diplomatik që do të kishtë marrë parasysh shqetësimet e Rusisë për sigurinë dhe do të kishte ndihmuar drejt arritjes së një paqeje afatgjatë dhe të qëndrushme”.

Kremlini tha në një deklaratë se gjatë bisedimeve të kësaj jave, zoti Putin dhe udhëheqësi kinez Xi Jinping do të “diskutojnë në mënyrë të detajuar mbi një sërë çështjesh që lidhen me partneritetin gjithëpërshirës dhe bashkëpunimin strategjik, do të përcaktojnë drejtimet kryesore për zhvillimin e mëtejshëm të bashkëpunimit mes Rusisë dhe Kinës dhe se do të shkëmbejnë mendimet mbi çështje kyçe ndërkombëtare dhe ato rajonale”.  Vizita shihet si një demonstrim i unitetit mes dy vendeve autoritare aleate, përballë Perëndimit të udhëhequr nga Shtetet e Bashkuara. /VOA

Fronti ukrainas duket se ka hyrë në një krizë. Ofensiva ruse në Kharkiv e cila filloi më 10 maj detyroi komandën e Kievit të lëvizte njerëz dhe automjete nga Donbasi për të ngadalësuar përparimin e pushtuesve, në Donetsk disa fshatra kanë rënë në duart e trupave të Moskës dhe dronët e raketat vazhdojnë të bien si shi nga qielli, ndërkohë që arsenalet e mbrojtësve po pakësohen gjithnjë e më shumë. Pas një viti lufte pozicionale, ushtria e Kremlinit ka fituar një avantazh të rëndësishëm ndaj forcave ukrainase, gurthemeli i të cilave është disponueshmëria praktikisht e pafundme e kapitalit njerëzor, burimeve dhe armatimeve. Të gjithë komponentët që janë në mungesë në Kiev dhe detyrojnë forcat e armatosura të kombit të pushtuar të racionojnë plumbat dhe të lënë ushtarët në front për muaj të tërë pa rotacion. Siç raportohet nga “New York Times”, ushtarët ukrainas janë të rraskapitur dhe më e keqja nuk ka ardhur akoma. Megjithatë, presidenti Volodymyr Zelensky duket se është i vetëdijshëm për situatën, rrezikun që i kanoset vendit, por edhe vetë atij.

Anulimi i vizitave

Ndaj ai ka anuluar udhëtimet jashtë Ukrainës teksa Rusia vazhdon ofensivën e re të madhe në rajonin verilindor të Kharkiv. Sekretari i shtypit i Zelensky-t, Sergii Nykyforov, tha në një postim në Facebook se Ukraina "ka dhënë udhëzime për të shtyrë të gjitha ngjarjet ndërkombëtare për pjesëmarrjen e tij, të planifikuara për ditët në vijim, dhe për të përcaktuar data të reja". Zelensky ishte planifikuar të vizitonte Spanjën dhe Portugalinë më vonë këtë javë, por Ukraina është nën presion të jashtëzakonshëm pasi forcat ruse sulmojnë rajonin e Kharkiv. Zelensky foli kohët e fundit me komandantët e tij të lartë dhe po merr informacione të rregullta nga gjenerali Oleksandyr Syrskyi, komandanti i përgjithshëm i forcave të armatosura të Ukrainës. Udhëheqësi ukrainas i ka dhënë përparësi udhëtimeve ndërkombëtare gjatë gjithë luftës, ndërsa kërkon të sigurojë mbështetjen. Në Spanjë, ai ishte planifikuar të takohej me mbretin Felipe dhe të nënshkruante një marrëveshje dypalëshe sigurie.

Ofensiva në Kharkiv

Ofensiva, e cila filloi të premten e kaluar, pa trupat ruse të futeshin në rajon nga rajoni fqinj i Belgorodit të Rusisë. Rusia që atëherë ka pushtuar disa fshatra, duke detyruar evakuimin e mijëra civilëve. Një betejë kyçe po zhvillohet gjithashtu në Vovchansk, pasi forcat ruse hynë në pjesën veriore të qytetit, i cili shtrihet në veri të qytetit të Kharkiv, qyteti i dytë më i madh në Ukrainë. Ndërsa Rusia nuk duket se ka trupa për të marrë qytetin, Moska mund të rrezikojë linjat e furnizimit dhe të rrethojë vetë qytetin, ndërsa gjithashtu t'i zvogëlojë trupat ukrainase teksa shmangin sulmet në frontin lindor. Çdo sukses i madh për Kremlinin do të kërcënonte përfundimisht kryeqytetin e Kievit për herë të parë që kur rusët pushtuan Ukrainën në shkurt 2022.

Alarmi i inteligjencës amerikane

Sakaq, njëherazi  Rusia ka rritur përpjekjet e saj të dezinformimit për të diskredituar  presidentin e Ukrainës Volodymyr Zelensky  dhe për të ngritur pyetje në lidhje me legjitimitetin e tij në muajt e fundit, siç kanë vërejtur agjencitë e inteligjencës amerikane. Një vlersim i inteligjencës i pakësuar së fundmi i ndarë me CNN thotë se Rusia ka shfrytëzuar ngjarje të ndryshme të kohëve të fundit për të nxitur kritikat për aftësitë dhe vendin e Zelenskyt si udhëheqës i Ukrainës, tha një zyrtar i lartë i administratës Biden në një intervistë. “Rusia ka përhapur dezinformata në lidhje me Zelenskyn që para fillimit të luftës, por inteligjenca e fundit tregon se ajo është padyshim në rritje," tha zyrtari. Rusia ka theksuar dy fusha kryesore tregon inteligjenca:  tërheqja e dhimbshme e Ukrainës  nga qyteti lindor Avdiivka dhe fakti që Ukraina shtyu zgjedhjet e planifikuara për këtë pranverë për shkak të luftës. “SHBA është më e shqetësuar për ndikimin e dezinformatave në vendet jashtë vendit sesa për besimin e ukrainasve te Zelensky-t”, tha zyrtari. "Kjo është arsyeja pse ne po informojmë aleatët dhe partnerët tanë për këtë," shtoi ai.

Pasi më 10 maj, forcat ruse nisën aksione të reja të ashpra sulmuese në rajonin verior të Kharkivit, veçanërisht në drejtim të Liptsi dhe Vovchansk, me kërcënimin e thyerjes së mbrojtjes së rrallë ukrainase atje, lajme alarmante për Ukrainën erdhën nga ajo fushëbetejë. Udhëheqësit politikë dhe ushtarakë në Kiev paralajmëruan se situata është jashtëzakonisht e vështirë, veçanërisht pranë Vovchansk, një qytet vetëm 5 deri në 6 kilometra nga kufiri me Rusinë, ku ishte përqendruar sulmi rus.Ka pasur edhe spekulime për krijimin e një 'zone tampon' në Ukrainë, për të cilën lideri rus Vladimir Putin foli pothuajse dy muaj më parë, në kontekstin e sulmeve intensive të Ukrainës në rajonin kufitar rus të Belgorodit.

Megjithatë, tani, të paktën siç vëren Instituti për Studimin e Luftës (ISW) me qendër në Uashington në raportin e tij të fundit ditor, mes zhvillimeve dramatike në fushën e betejës dhe spekulimeve rreth synimeve reale të Rusisë, duket se ka një ndryshim të papritur. Sipas ISW, ritmi i operacioneve ofensive ruse në rajonin e Kharkiv duket se është ngadalësuar gjatë 24 orëve të fundit dhe modeli i aktivitetit sulmues rus në zonë, siç u theksua, është në përputhje me vlerësimin e ISW se forcat ruse po i japin përparësi krijimit të zonës tampon' në zonën kufitare, dhe jo një depërtim më të thellë në rajonin e Kharkiv.

Disa zyrtarë ushtarakë ukrainas raportuan të mërkurën se besojnë se situata në rajonin e Kharkiv po stabilizohet ngadalë.

Kreu i Drejtorisë Kryesore të Inteligjencës Ushtarake të Ukrainës (GUR), Kirilo Budanov, tha se situata filloi të stabilizohej, ndërsa njësi shtesë ukrainase u vendosën në zonë dhe filluan operacionet mbrojtëse kundër avancimit rus.

Presidenti rus Vladimir Putin ka mbërritur në Kinë për një vizitë shtetërore dy-ditore, teksa të dy vendet synojnë të thellojnë më tej një marrëdhënie që është afruar më shumë që kur Moska filloi agresionin mbi Ukrainë më shumë se dy vjet më parë.

Vizita vjen disa ditë pasi Rusia nisi një ofensivë të re në rajonin verilindor të Kharkivit të Ukrainës dhe siç pretendon ajo përparon në vijën e frontit 1000 km (600 milje) ku forcat e Kievit janë penguar nga dërgesat e vonuara të armëve dhe municioneve nga Shtetet e Bashkuara, shkruajnë mediat e huaja.

Transmetuar drejtpërdrejt në televizionin shtetëror, autokolona e Putinit prej gati 20 automjetesh e shoqëruar nga një formacion motoçiklistësh të veshur me uniforma të bardha ceremoniale, mbërriti jashtë Sallës së Madhe të Popullit të Pekinit rreth orës 11 të mëngjesit për të takuar presidentin kinez Xi Jinping.

Në diskutimet e mëvonshme, Xi e vlerësoi Putinin si një “mik të vjetër”.

Ai i tha presidentit rus se “marrëdhënia e Kinës dhe Rusisë i kishte qëndruar provës së kohës” dhe se ata i kishin ofruar njëri-tjetrit “udhëzime strategjike” në më shumë se 40 takimet e tyre mbi dekadën e kaluar.

“Kina është e gatshme të punojë me Rusinë për të qëndruar fqinj i mirë, mik i mirë dhe partner i mirë i njëra-tjetrës”, tha agjencia shtetërore e lajmeve Xinhua.

Putin dhe Xi deklaruan një partneritet “pa kufij” disa ditë përpara se Putini të dërgonte trupat e tij në Ukrainë në shkurt të vitit 2022.

Në mars 2023, kur Xi vizitoi Moskën, ai përshkroi një “epokë të re” në marrëdhëniet e vendeve, ndërsa në tetor, kur Putin ishte së fundi në Pekin, Xi foli për “miqësinë e thellë” midis dy burrave.

Përpara udhëtimit, 71-vjeçari Putin tha se zgjedhja e tij e Kinës si destinacioni i tij i parë i huaj që kur u betua si president për një mandat të pestë, nënvizoi “nivelin e lartë të paparë të partneritetit strategjik” midis dy vendeve, si dhe të miqësisë së tij të ngushtë me Xi, i cili është 70 vjeç. 

Finlanda po planifikon të ndryshojë rregullat e saj të rekrutimit për të lejuar rezervistët të ndihmojnë në patrullimin e kufirit me Rusinë në rast se ka një valë të papritur emigrantësh, raportoi Reuters më 15 maj.

Sipas rregullave të reja, finlandezët që kanë kryer shërbimin ushtarak në forcat kufitare tani mund të thirren për të patrulluar kufirin me Rusinë në rrethana të jashtëzakonshme.

Finlanda mbylli kufirin e saj me Rusinë në fund të nëntorit 2023 pasi Rusia orkestroi një fluks emigrantësh si një mënyrë për të bërë presion ndaj Helsinkit.

Vetëm në nëntor, rreth 900 azilkërkues nga vende si Kenia, Maroku, Pakistani, Somalia dhe Jemeni hynë në Finlandë nga Rusia.

Qeveria finlandeze vendosi muajin e kaluar të mbyllë kufirin për një kohë të pacaktuar.

Qeveria e Finlandës vendosi gjithashtu të mbyllë disa pika kalimi për trafikun detar për shëtitjet me varkë të lirë për shkak të shqetësimeve se Rusia mund të inkurajojë emigrantët të arrijnë në Finlandë përmes detit ose liqeneve.

Strategjia e Rusisë për dërgimin e azilkërkuesve në kufirin lindor të Finlandës ishte e ngjashme me situatën në kufirin midis Bjellorusisë dhe Polonisë në vitin 2021, kur Minsk inkurajoi mijëra azilkërkues nga Lindja e Mesme dhe Afrika që të përpiqeshin të arrinin në BE përmes kufirit polak.

Ndryshimet në politikat e rekrutimit të Finlandës do të hidhen në votim në parlament.