Senatori amerikan, John McCain ka thënë se pranimi i Malit të Zi në NATO është vendimtar në stabilitetin e rajonit, pas aksioneve të Rusisë , të cilat ai i quajti “të papranueshme”.
McCain i bëri këto komente pas takimit me ministrin e Mbrojtjes së Malit të Zi, Predrad Boskoviq në Podgoricë.
Ky takim vjen vetëm një ditë pasi presidenti i Shteteve të Bashkuara, Donald Trump nënshkoi ratifikimin e anëtarësimit të Malit të Zi në NATO, gjë të cilën Moska e ka kundërshtuar ashpër.
“Besoj se sjellja ruse kërkon solidaritetin dhe forcën tonë, në mënyrë që të ruhen parimet dhe bazat e demokracisë”, ka thënë McCain, i cili është nëjri prej kritikëve më të zëshëm të presidentit rus, Vladimir Putin në Kongresin amerikan.
Zyrtarët në Mal të Zi kanë akuzuar Rusinë se është e përfshirë në komplotin për puç vitin e kaluar. Rusia ka hedhur poshtë këto akuza.
Moska që një kohë të gjatë kundërshton zgjerimin e NATO-s dhe e ka përshkruar anëtarësimin e Malit të Zi në aleancën ushtarake si “provokim”.
