Rusia kritikoi sot përpjekjet, duke i quajtur krejtësisht të palogjikshme për të hedhur përgjegjësitë e sulmit kimik në Siri mbi regjimin e Damaskut, duke akuzuar SHBA-të se po kërkon të imponojë një vizion të gabuar të këtyre incidenteve.
“Përpjekjet për të hedhur përgjegjësinë mbi Damaskun janë krejtësisht të palogjikshme”, deklaroi ministria ruse e Punëve të Jashtme në një komunikatë.
“Ne i kërkojmë partnerëve tanë në Këshillin e Sigurimit në OKB të kenë mirëkuptim dhe t’i japin një vlerësim objektiv përpjekjeve të SHBA-ve për të imponuar një vizion të gabuar të përgjegjësisë së këtyre incidenteve kimike në Siri”, theksohet në këtë komunikatë.
Sekretari i përgjithshëm i OKB-së, Antonio Guterres i kërkoi dje Këshillit të Sigurimit që të rifillojë përpjekjet për të ndëshkuar përgjegjësit e sulmeve kimike në Siri pas vetos ruse në nëntor për vazhdimin e hetimeve ndërkombëtare, ndërkohë që ambasadorja e SHBA-ve në Kombet e Bashkuara, Nikki Haley ka akuzuar Moskën se mbron Damaskun.
