Një gomone e mbingarkuar me emigrantë u përmbys para agimit të së shtunës në Kanalin Anglez, duke vrarë të paktën gjashtë persona dhe duke rrezikuar jetën e më shumë se 60 të tjerëve.
Por pavarësisht kësaj tragjedie, kontrabandistët shqiptarë dhe jo vetëm vazhdojnë të reklamojnë kalimet e rrezikshme të Kanalit për emigrantët.
Dhjetra reklama që ofrojnë udhëtime me gomone në Britani shfaqen në TikTok dhe Instagram, me banditë që rrëmbejnë para duke joshur klientët me garanci sigurie. Njëri i tha një gazetari të fshehtë të DailyMail se ne nuk do të vuanim fatin tragjik të atyre që vdiqën nëse paguanim 3000 £ për një udhëtim nga Calais në Dover duke u nisur në muzg.
Një kontrabandist shqiptar i njerëzve që ofron kalime në Kanalin Anglez dhe reklamat i poston në TikTok tha se çdo ditë dërgon gomone me emigrantë në Mbretërinë e Bashkuar. Kur gazetari e pyeti për sigurinë, ai u përgjigj:
"Mos u shqetëso. Njerëzit që u mbytën nuk ishin klientët tanë. Ne takuam njerëz mbrëmë, pa problem. Askush nuk u mbyt, të gjithë mbijetuan."
I pyetur nëse e dinte pse ishte përmbytur gomonia, ai tha:
"Nuk e di. Thjesht pafat."
Llogaria TikTok e kontrabandistit shmang filtrin e rrjetit social duke zëvendësuar fjalë të tilla si Mbretëri e Bashkuar dhe Francë me ikona emoji.
