Policia italiane në komunën e Revellos ka arrestuar një 25-vjeçar shqiptar me iniciale G.E. Mediat italiane raportojnë se për të riun shqiptar ishte lëshuar një urdhër ndalimi nga Prokuroria e Përgjithshme e Torinos për një vrasje të mbetur në tentativë.
Bëhet fjalë për një ngjarje të ndodhur në 2012, ku i riu shqiptar kishte hyrë në banesën e një bashkëatdhetari të tij dhe kishte tentuar ta vriste në gjumë me çekiç dhe thikë, për shkak të disa mosmarrëveshjeve që kishin më parë.
Personi, i cili mbeti i plagosur rëndë nga ky sulm arriti që të zgjohej në kohë duke reaguar. Ai ka më pas ka dalë në rrugë për të kërkuar ndihmë.
25-vjeçari shqiptar i arrestuar ndodhet në paraburgim në Saluzzo dhe rrezikon të dënohet me 8 vjet e 6 muaj burg.