Viprint, një ndër shtypshkronjat lider në vend, organizoi sot eventin e inaugurimit të instalimit të linjës së re për paketime industriale dhe hapësirave të reja prodhuese në fushën e printit në vazhdën e zgjerimit të kapaciteteve të saja, teknologjike dhe infrastrukturore. Ceremonia inauguruese u zhvillua ne hapësirat e Viprint-it, që ndodhet në Parkun e Biznesit në Mitrovicë.
Visar Idrizi, drejtor menaxhues i Viprint, theksoi se Viprint ka tashmë një histori të gjatë të punës dhe sukseseve.
“Dua të theksoj se sot ne po inaugurojmë një fazë të re të rëndësishme në jetën e kompanisë. Ceremonia sot na bën më të vetëdijshëm për rëndësinë që luajmë ne sektori privat në zhvillimin e vendit tonë, duke sjellë pandërprerë inovacion dhe duke krijuar më shumë mundësi për të gjithë dhe punësim të qëndrueshëm për profesionistë të këtij sektori”, tha Idrizi.
Kryetari i komunës së Mitrovicës Agim Bahtiri, i pranishëm në këtë ceremoni, shprehu kënaqësinë e tij për këtë investim të cilin ai e cilësoi si shumë domedhënës jo vetëm për Viprint, por edhe për vetë Mitrovicën dhe imazhin e sektorit privat në Mitrovicë.
“Kjo i jep më shumë kuptim edhe vetë Parkut të Biznesit në Mitrovicë”, theksoi Bahtiri i cili pasi përgëzoi kompaninë në fjalë për këto arritje, njëkohësisht inkurajoi edhe bizneset tjera të investojnë në Mitrovicë.
Naim Dedushaj, Drejtor i Investimeve të Diasporës dhe udhëheqës i Rrjetit të Bizneseve të Diasporës, në fjalën e tij të rastit tregoi përvojën e tij me Viprint, për të cilën tha se përfaqëson modelin e një investimi bashkohorë, gjë që e ka renditur tashmë në rangun e bizneseve ndërkombëtare në fushën e printit.