Mijëra persona kanë dalë në rrugët e Varshavës për të protestuar kundër reformave në gjyqësor.
Senati i Polonisë ka miratuar dy projektligje për gjyqësorin, të cilat opozita i konsideron tentim nga partia konservatore në pushtet për minimin e ndarjes së pushteteve.
Protestuesit kanë marshuar pranë pallatit presidencial duke brohorit liri dhe barazi, si dhe i kanë kërkuar presidentit të Polonisë, Andrzej Duda, të përdorë veton ndaj këtyre projektligjeve.
Protestat janë organizuar nga partitë opozitare të krahut të majtë dhe disa qytetarë.
Projektligji i parë që pret miratimin e presidentit Duda, përcakton se parlamenti, që tani kontrollohet nga partia e krahut të djathtë, Ligji dhe Drejtësia (PiS), do të zgjedh anëtarët e Këshillit Kombëtar të Gjyqësisë.
Roli i këtij këshilli është mbrojtja e pavarësisë së gjykatës.
Projektligji i dytë i jep autoritetin ministrit të Drejtësisë, të emërojë gjyqtarët e Gjykatës Supreme.
Sipas po këtij projektligji, gjyqtarët e Gjykatës Supreme mund të detyrohen të dalin në pension, përveç atyre që i zgjedh ministri për të qëndruar.
Disa anëtarë të Parlamentit Evropian kanë thënë se këto projektligje janë pengesë për pavarësi të gjyqësorit në Poloni.