Kancelarja gjermane Angela Merkel paralajmëron se projekti i gazsjellësit të North Stream 2 nuk është i mundur pa specifikuar rolin e Ukrainës në transitin e gazit rus në Evropë.
"Nuk është e mundur që për shkak të North Stream 2, Ukraina nuk ka rëndësi për transitin e gazit," tha Merkel në një konferencë shtypi me presidentin ukrainas, Peter Poroshenko.
North Stream 2 është zgjerimi i gazsjellësit ekzistues përmes Detit Baltik, i cili anashkalon vendet e Evropës Lindore të përfshira në transitin e gazit rus në vende të tjera në Evropë.
Tubacioni i gazit, të cilin e kritikojnë disa vende të BE dhe Kievi zyrtar, duhet të lejojë më shumë gaz rus të mbërrijë direkt në Gjermani përmes Detit Baltik, duke anashkaluar Ukrainën. Me këtë, Ukraina do të privohej nga e drejta e transitit të gazit nga Moska, që është një burim i rëndësishëm i të ardhurave.
Gjermania ka mbrojtur gjatë North Stream 2 si një projekt thjesht komercial dhe në fund të marsit ajo hoqi pengesat e fundit për ndërtimin e saj dhe për shfrytëzimin e gazsjellësit rus në ujërat e saj.
Deklarata e papritur e kancelares gjermane sugjeron një mosmarrëveshje të re me Moskën, shkruan AFP, sipas së cilës tensionet midis Perëndimit dhe Rusisë nuk kanë ndalur vitet e fundit, veçanërisht për shkak të konfliktit në lindje të Ukrainës, në të cilin separatistët pro-rusë i kundërvihen forcave të Kievit.
