Pas sezonit 2015, ku Ferrari arriti tri fitore në kampionat, viti 2016 ishte një dështim për makinën kokëkuqe në Botërorin e Formula 1, ku fitorja mungoi.
Ndaj, për pilotin finlandez, Kimi Raikkonen, ky është një rezultat zhgënjyes, pasi asnjë fitore është një dështim për Ferrarin.
“Kemi vuajtur shumë, por edhe kemi dhënë maksimumin në pistë. Për fat të keq, rezultatet nuk ishin ato që prisnim. Megjithatë, dua të falënderoj të gjithë skuadrën, pasi punuan për t’u përmirësuar dhe për të mësuar shumë nga ky sezon”, ka deklaruar Raikkonen për mediat italiane.
Pikërisht puna e kryer dhe mësimi që ka marrë Ferrari gjatë këtij viti mbush me shpresë pilotin italian për të ardhmen, ku pret një ndryshim rrënjësor për vitin 2017.
“Pikërisht, se e di që sa shumë punohet, besoj te Ferrari dhe besoj shumë te sezoni i ardhshëm. Jam i sigurt se makina do të jetë kompetitive vitin tjetër”.
“Në planin personal, ky sezon ishte më i mirë se viti 2015, por nuk jam i lumtur, pasi jemi ende larg fitores që duhet të vijë me çdo kusht sezonin e ardhshëm”, ka shtuar më tej piloti finlandez i kokëkuqes, me të cilën u shpall kampion bote vitin 2007.
