Valtteri Bottas me Mercedes fitoi sot garën e Çmimit të Madh të Austrisë në Formula 1, garë të cilën e dominoi nga xhiro e parë deri tek e fundit. Piloti finlandez e nisi atë nga “pole position” fituar dje, zhvilloi një garë të përkryer dhe pa gabime, duke u shkëputur dhe arritur një sukses të merituar, i dyti për të këtë sezon dhe në karrierën e tij. Në vendin e dytë u rendit Sebastian Vettel me Ferrari, që edhe pse kishte një shans të mirë për të thelluar diferencën me rivalët në renditje, në fund u detyrua të kënaqet me vendin e dytë. Ferraristi e nisi dhe e mbylli garën në këtë pozicion, nuk ishte asnjëherë agresiv, por në fund mori pikë të rëndësishme për Botërorin. I treti u klasifikua Daniel Ricciardo me Red Bull, që la pas Lewis Hamilton me Mercedes.
Gara e zhvilluar në pistën e Spielberg, nis me surpriza, pasi që në kthesën e parë ka aksidente në pistë, nga ku e pësojnë dy kampionë si Fernando Alonso e Max Verstappen. Ky i fundit garonte para fansave të tij, të shumtë në Spielberg, por nuk ka mundur t’i kënaqë ata, duke u detyruar të tërhiqet pas vetëm pak metrash. Për sa i përket pilotëve të tjerë, asnjë ndryshim në krye, me Bottas që mban komandën, madje arrin të shkëputet karshi Vettel, që është i dyti. Ai që nis të rikuperojë është Lewis Hamilton, që e nisi garën nga vendi i tetë, por shpejt e sheh veten në vendin e pestë. Pas xhiros së 20-të nis ndërrimi i gomave për pilotët, por nuk ka ndryshime të mëdha në renditje.
I fundit nga pilotët që hyn në bokse është Raikkonen, që del në vendin e pestë, duke i lëshuar vendin e katërt Hamilton, ndërsa në tri vendet e para, të shkëputur nga njëri-tjetri janë Bottas, Vettel dhe Ricciardo. 25 xhiro nga fundi, ata kanë 4 sekonda diferencë nga njëri-tjetri, duke bërë një garë të qetë edhe pse Vettel me Ferrari rikuperon shumë. Edhe Hamilton në fund tenton të kapë zonën e podiumit, duke rivalizuar me Ricciardo, por pa sukses, duke e mbyllur garën në vendin e katërt, raporton telesport.
Dy xhirot e fundit Vettel tenton të surprizojë Bottas, por pa sukses edhe pse hyn në zonë parakalimi, duke i dhënë jetë një finishi mjaft emocionues, ndoshta momenti i vetëm spektakolar i garës pas startit. Finlandezi i Mercedes fiton me meritë një garë pa shumë emocione, duke lënë pas Vettel, që kryeson renditjen e Formula 1 dhe e çon në 20 pikë diferencën me Hamilton. Në vendin e pestë u rendit Kimi raikkonen me makinën tjetër Ferrari e pas tij, deri në vendin e dhjetë u klasifikuan Grosejan (Haas), Perez (Force India), Ocon (Force India), Massa (Williams) dhe Stroll (Williams). Pas një jave garohet në pistën e Silverstone (Britani e Madhe).
