Frank Lampard është në vështirësi. Diçka të tillë e konfirmojnë numrat, ndërsa ish-mesfushori është rikthyer në stolin e Chelsea, skuadër të cilën do ta drejtojë deri në përfundimin e sezonit.
Deri më tani, në këtë rikthim, Lampard numëron 5 humbje në 5 ndeshje duke regjistruar kështu një ecuri shumë negative, e cila jo vetëm po ndikon te skuadra dhe klubi, por edhe te vetë ai.
Në 10 ndeshjet e fundit si trajner, Lampard ka arritur të marrë vetëm një pikë, një barazim përballë Manchester City-t në ditën e fundit të vitit 2022, kur ishte në drejtimin e skaudrës së Everton.
Drejtuesit londinezë kanë bërë me dije se bashkëpunimi me ish-mesfushorin do të përfundojë në fund të sezonit, por ajo çfarë është më e pasigurt është e ardhmja e vetë 44-vjeçarit, i cili me këtë ecuri ka zhgënyer shumë dhe vështirë se mund të tërheqë vëmendjen e një klubi tjetër.
Në karrierën e tij si trajner, Lampard numëron 190 ndeshje me tri ekipe Derby, Everton dhe Chelsea duke koleksionuar 80 fitore, 42 barazime dhe 68 humbje.
