Nasser Al Khelaïfi udhëtoi për në Portugali këtë javë për të dëshmuar përurimin e qytetit të ri sportiv të Sporting Bragës, një klub në të cilin QSI, një fond investimesh nga Katari, që mban 100% të PSG-aë, ka 21% të aksioneve.
Presidenti i skuadrës pariziene ka dhënë një intervistë për gazetën “Record” për të shqyrtuar çështje të ndryshme aktuale të klubit, përveçse ka folur hapur, edhe pse me ndrojtje, për Kylian Mbappénë.
“Kylian Mbappé është një lojtar i jashtëzakonshëm dhe një person fantastik”, pranoi Nasser Al Khelaïfi.
Një javë më parë, gjatë shortit të Ligës së Kampionëve, ai aludoi për familjen e lojtarit, por nuk ka dashur të komentojë për një rinovim të mundshëm.
Gazeta “L’Équipe” njoftoi këtë të hënë se qëllimi i lojtarit tani nuk është të rinovojë dhe të jetë i lirë vitin e ardhshëm, kur i skadon kontrata.
“Ekipi i PSG-së, brenda dhe jashtë fushës, nuk ka qenë kurrë kaq i bashkuar dhe mendoj se kjo ishte evidente fundjavën e kaluar kundër Lyonit”, shtoi ai.
Ai vuri në pah edhe punën e dyshes Luis Campos-Luis Enrique: “Kemi një trajner dhe drejtor sportiv fantastik dhe jam shumë i lumtur me frymën e re që po krijohet në PSG”.
Së fundi, presidenti i PSG-së theksoi fillimin e një cikli të ri në Paris, pas shumë vitesh në të cilin klubi ka qenë një përmbledhje yjesh, por pa frymë kolektive.
“Këtë vit, në ciklin e ri të PSG-së, ne jemi më pak të fokusuar te rezultatet dhe më shumë te performanca dhe stili ynë i lojës. Nëse e bëjmë këtë, rezultatet do të vijnë në përputhje me rrethanat”, përfundoi ai.
