Shkëndija e Tetovës dhe Struga , skuadra kampione në fuqi e Maqedonisë së Veriut, eliminohen nga Kupa në raundin e 1/8-ve. Ndërkohë që Shkupi kalon në çerekfinale falë suksesit 4-0 përballë Ohrid.
Kuqezinjtë e Shkëndijës u mposhtën 3-2 në transfertë nga Rabotniçki.
Vendasit kaluan në avantazh me anë të Stojanovskit, por Shkëndija përmbysi rezultatin në pjesën e parë. Falë golave të Cakes dhe Elezit.
Gjithsesi, skuadra shqiptare nuk e menaxhoi avantazhin dhe u përmbys nga realizimet e Gandos dhe Mazarit.
Jashtë Kupës së Maqedonisë së Veriut edhe Struga, që e mbylli në barazim 0-0 derbin e Liqenit kundër Voska Sport. Skuadra nga Ohri iu fal penalltive për të vijuar rrugëtimin në fazën çerekfinale.
Feston me “poker” Shkupi. Bardhekaltrit mposhtën 4-0 Ohrid, duel ku golat e kryeqytetasve u shënuan nga Dudu, Trapanovski, Queven dhe Mladenovski.
