Carlo Ancelotti nuk mund ta fshihte lumturinë pas fitores në “El Clasico”, që erdhi falë një dygolëshi të lojtarit më të mirë të “Los Blancos” në këtë fillim sezoni, Jude Bellingham.
“Çelësi i fitores ishte diferenca në qëndrim nga pjesa e parë në pjesën e dytë.
Në të parën ishim të ngadaltë, të dobët, jo shumë agresivë, nuk ishim në nivelin tonë, por në të dytën ndodhi e kundërta. Hyrja e Modricit ishte thelbësore, filluam të kishim më shumë zotërimin e topit dhe Bellingham ishte shumë efektiv”, tha italiani, duke pranuar se ishte i befasuar nga seria e golave të ish-futbollistit të Borussias së Dortmundit, i cili ka shënuar 13 gola në po kaq ndeshje.
“Ne jemi shumë të befasuar nga Bellingham, veçanërisht nga efektiviteti i tij.
Ai po shënon shumë, duket si një veteran. Po bën diferencën dhe na ndihmoi të arrinim fitoren në një stadium shumë të vështirë”.
